Suid-Australië se premier sê giftige alge-opbloei is natuurramp

# ‘n Alge-opbloei het die Suid-Australiese kuslyn groen verkleur en tot groot seelewe-vrektes gelei. Die premier van Suid-Australië, Peter Malinauskas, sê die verskynsel is ‘n natuurramp wat volgens wet as sodanig verklaar moet word. Die alge-opbloei kom natuurlik voor, maar word veroorsaak deur die verwarming van die oseane, see-hittegolwe en die besoedeling van voedingsbronne in die see – alles regstreekse gevolge van klimaatsverandering. Die alge-opbloei het in Maart begin, is reeds twee maal groter as die oppervlak van die Australiese Hoofstadgebied en het dooie seediere aan die kus laat uitspoel.