# Die minister van Bosbou, Visserye en die Omgewing, Dion George, woon die week die tweede Afrika-klimaatberaad in Ethiopië by. Die beraad bied ʼn platform vir beleidmakers, praktisyns, sakeondernemings en die burgerlike samelewing om Afrika se klimaatagenda en volhoubare ontwikkelingsvoorkeure te bevorder. Vanjaar se tema is: Versnel globale klimaatoplossings: Finansiering vir Afrika se veerkragtige en groen ontwikkeling. George sê as een van die streke wat volgens hom die ergste deur klimaatsverandering geraak word, is die beraad ʼn aanduiding dat Afrika-mense nie oorgerus of onbewus van die klimaatskrisis is nie.