Nuus 14:00

BULLETIN 26 Oktober 2 nm

Goeiemiddag. Ek is……..

In die bulletin:

# De Kock beweer politieke leiers was bewus van misdade tydens die apartheidsera
# Ramaphosa ontplooi 510 soldate na KwaZulu-Natal te midde van anti-immigrasie-onluste
# En rugby: Die Springbokke is bekommerd oor die beseerde Esterhuizen se fiksheid

# Die voormalige apartheids-polisie-offisier, Eugene de Kock, het voor die Waarheids- en Versoeningskommissie-ondersoek getuig senior politieke ampsdraers was bewus van misdade en was daarby betrokke. Hy beweer die destydse minister van Wet en Orde, Louis le Grange, het die bomaanval op ANC-kantore in Londen goedgekeur en Adriaan Vlok, wat dieselfde portefeulje beklee het, het hom gelukgewens ná die bomaanvalle op die Suid-Afrikaanse Raad van Kerke en COSATU. De Kock sê senior polisie-generaals is nooit vervolg nie:

# President Cyril Ramaphosa het die ontplooiing van 510 Weermag-soldate na KwaZulu-Natal goedgekeur te midde van betogings teen immigrasie in Durban. Die ontplooiing, wat sowat 34-miljoen-rand kos, vorm deel van Operasie Prosper en duur tot 30 November. Ramaphosa het die Parlement op 21 Oktober skriftelik van die besluit ingelig, soos die Grondwet vereis. Hy sê geweld tydens die betogings is aangevuur deur waninligting oor ‘n hofuitspraak, en een persoon is verlede week dood. Ramaphosa sê soldate is gereed om op te tree.

# Die parlementêre Gesondheidskomitee sê dis nie genoeg om een ​​amptenaar te skors oor die waterkrisis in Bronkhorstspruit, Gauteng, nie. Voorsitter Faith Muthambi het aan eNCA gesê Tshwane se bestuur en politieke leierskap moet aanspreeklik gehou word. Die metro erken inwoners het onbehandelde water gedrink. Meer as 400 gevalle van maagdermsiektes is aangemeld. Muthambi sê die bestuurder van die wateraanleg is geskors en strafregtelike sake aanhangig gemaak, maar vroeëre waarskuwings oor watergehalte is nooit opgevolg nie:

# Rugby: Die Springbokke is bekommerd oor die fiksheid van die veelsydige André Esterhuizen. Hy het Saterdag vroeg in die wedstryd sy voet beseer toe hy die Haaie aangevoer het in ‘n Verenigde Rugbykampioenskaps-kragmeting met Cardiff in Wallis. Sy span het voortgegaan en 36-21 gewen. Die Haaie se slot, Stephan Lewies, het vroeër gesê die meeste spelers hou nie van kunsmatige oppervlakke soos op Cardiff Arms Park nie omdat talle beserings daarop plaasvind. Die Bokke pak Italië, Frankryk en Ierland in volgende maand se Nasieskampioenskapstoetse in Europa.

# Die finansiële aanwysers: Die rand verhandel teen 16-rand-62-sent teen die dollar, 18-rand-62-sent teen die euro en 22-rand-19-sent teen die pond. Bitcoin verhandel teen 80-duisend-336-dollar. Die prys van goud is vier-duisend-en-13-dollar-4-sent per fynons en die prys van Brent-ruolie is 115-dollar-27-sent per vat.

# En ten slotte: Binnelandse Sake sê meer as ‘n miljoen Suid-Afrikaners het in sewe maande toegang verkry tot sy slim ID-vervangingsdienste in deelnemende banktakke. Die digitale diens is nou beskikbaar in 669 takke landwyd, wat toegang tot 873 dienspunte verhoog. Die departement sê aansoeke neem ongeveer vyf minute. Hy beplan om dienste uit te brei om eerstekeer-slim ID’s, paspoorte en tuisaflewering in te sluit. Die departement het Suid-Afrikaners ook daaraan herinner dat die produksie van die groen identiteitsboekie in Maart volgende jaar eindig.

Bly ingeskakel vir meer nuus……………….