NUUSFLITS NUUSAGENTSKAP 8 Februarie 11 vm

Goeiemôre,

In die bulletin:

# Business Leadership SA sê dis onaanvaarbaar om die verslapping van Covid-19 beperkings in die werkplek verder te vertraag
# Die DA eis vinnige ingryping by die Hoërskool Glenvista na bewerings van geweld en afknouery
# En, Nieu-Seeland se krieketkaptein, Kane Williamson, is uit die toetsreeks teen die Proteas

# Business Leadership South Africa sê weens die werkloosheidskrisis in die land en dringende behoefte aan ekonomiese groei is dit onaanvaarbaar dat die verslapping van Covid-19-beperkings in die werkplek langer as nodig vertraag word. Besighede word steeds verplig om die getal mense op kantoor deur rotasie en aangepaste werksure laag te hou. Besighede met meer as 50 werknemers moet aan die Departement van Gesondheid verslag doen oor werknemers wat meer vatbaar is vir siekte, asook diegene met ‘n hoë risiko om Covid-19 op te doen. Die uitvoerende hoof van Business Leadership South Africa, Busi Mavuso, sê die feit dat die regering nie beperkings op die werkplek verlig nie, wys die ekonomie kry eenvoudig nie genoeg aandag nie.

# Die DA in Gauteng doen ‘n beroep op die Gautengse LUR vir Onderwys, Panyaza Lesufi, om dringend ‘n aantal voortslepende kwessies by Hoërskool Glenvista in Johannesburg op te los omdat dit onderrig en leer ontwrig. Khume Ramulifho van die party sê die skool beleef sedert die begin van die jaar ernstige uitdagings wat dissipline, bakleiery en afknouery betref. Hy sê daar is geen plek vir afknouery en geweld in skole nie:

Speel klankgreep: ENGKhumeRamulifho

# Die Suid-Afrikaanse Suikerrietkwekersvereniging sê die onlangse uitbetaling van 225-miljoen-rand aan swart en kleinskaalse suikerrietkwekers bied broodnodige verligting. Die vereniging sê hierdie boere het die afgelope twee jaar uitdagings in die gesig gestaar soos wydverspreide brandstigting tydens die Julie-onluste verlede jaar, die onkoste om Covid-19 te bekamp, en die skerp styging in die prys van byvoorbeeld kunsmis. Hy sê die fondse sal die oorlewing en sukses van kleinskaalse kwekers verseker.

# Die Kanadese eerste minister, Justin Trudeau, sê Kanadese het die reg op protes en om van hul regering te verskil, maar hulle het nie die reg om die ekonomie, demokrasie, en die daaglikse lewe van hul mede-landsburgers te ontspoor nie. Honderde vragmotors en motors versper al amper twee weke lank dele van die middestad van die Kanadese hoofstad Ottawa uit protes teen die land se Covid-19-beperkings en beleid oor verpligte inenting. Die burgemeester van Ottawa, Jim Watson, het Sondag ‘n noodtoestand afgekondig. Trudeau sê die protesoptrede moet einde kry:

Speel klankgreep: ENG TrudeauOnOttawa

# Krieket: Nieu-Seeland se kaptein, Kane Williamson, is weens ‘n knaende elmboog-besering uit die twee-wedstryd-toetsreeks teen Suid-Afrika. Tom Latham sal die span lei. Die blitsbouler Trent Boult sal die eerste toets misloop in afwagting op die geboorte van sy derde kind. Nuwelinge Cam Fletcher en Blair Tickner is ingeroep vir wat moontlik albei se toetsdebuut sal wees. Die Nieu-Seelandse afrigter, Gary Stead, sê hy het vir die reeks genoeg talent tot sy beskikking om vir Williamson se afwesigheid te vergoed.

# En die finansiële aanwysers: Die rand verhandel teen 15-rand-56-sent teen die dollar, 17-rand-74-sent teen die euro en 21-rand-4-sent teen die pond. Bitcoin verhandel teen 44-duisend-922-dollar-3-sent. Die prys van goud is een duisend-817-dollar-11-sent per fynons en die prys van Brent ruolie 92-dollar-9-sent per vat.

Vir die jongste nuusgebeure, bly ingeskakel op ……………….