Nuus 07:00 (DGO)

BULLETIN 13 November 7 vm

Goeiemôre. Ek is……..

In die bulletin:

# President Ramaphosa lei die Suid-Afrikaanse afvaardiging oor KI na Silicon Valley
# Die hoof van die NVG sê wetstoepassingsagentskappe versterk hul samewerking om misdaad te bekamp
# En rugby: Siya Kolisi is nie bekommerd oor Frankryk se keuse van Antoine Dupont as losskakel nie

# President Cyril Ramaphosa sal van 15 tot 21 November ‘n hoëvlak- Suid-Afrikaanse afvaardiging na Silicon Valley in die VSA lei om ontwikkelings en beleggingsgeleenthede in kunsmatige intelligensie te ondersoek. Die afvaardiging sal met tegnologiemaatskappye, beleggers en navorsers vergader en ook Stanford Universiteit besoek. Die woordvoerder van die presidensie, Vincent Magwenya, sê die besoek het ten doel om Suid-Afrika se tegnologiese vermoëns te versterk, beleggings te lok en die land as ‘n toonaangewende KI-spilpunt op die Afrika-vasteland te vestig. Hy sê die afvaardiging sal verskeie instansies en individue besoek met die klem op die ontwikkeling van KI.

# Die nasionale direkteur van Openbare Vervolging, Andy Mothibi, sê mense wat misdade pleeg moet weet hulle sal opgespoor, ondersoek en doeltreffend vervolg word. Hy het deelgeneem aan die internasionale konferensie oor toegang tot geregtigheid vir almal by Sun City in Noordwes. Mothibi sê die groepering vir Justisie, Misdaadvoorkoming en Veiligheid sal voortbou op hul standpunt dat misdaad nie geduld sal word nie. Hy sê wetstoepassingsagentskappe versterk samewerking en integreer hul pogings om misdaad te bestry. Hy sê die skakeling tussen die polisie se teenkorrupsie-afdeling en die vervolgingsgesag het reeds vrugte afgewerp.

# Die staat beskuldig die gewese waarnemende nasionale polisiekommissaris, Khomotso Phahlane, dat hy afwykings vir twee programmatuur-kontrakte ter waarde van sowat 54-miljoen-rand sonder die wetlike vereistes goedgekeur het. Die eerste kontrak hou verband met die vermeende onregmatige aankoop van sagteware RIPJAR, wat in Oktober 2015 tydens die #FeesMustFall-betogings gebruik sou word. Die tweede is die aankoop van kommunikasie-enkodering programmatuur, Daedalus. Die staat voer aan die wyse waarop die aankoop-proses hanteer is, het gekeer dat die SAPD ander diensverskaffers kon nader wat die produkte moontlik teen laer pryse kon voorsien.

# Die Stad Johannesburg sê byna 50-duisend pensioenarisse trek voordeel uit eiendomsbelastingkortings ter waarde van meer as 31-miljoen-rand. Die verligting is daarop gemik om bejaarde huiseienaars met hul lewenskoste te help. Pensioenarisse van 60 jaar en ouer kan kwalifiseer, afhangende van hul inkomste en eiendomswaarde, terwyl diegene van 70 jaar en ouer kwalifiseer vir bykomende verligting. Bestaande begunstigdes hoef nie weer aansoek te doen nie, terwyl kwalifiserende pensioenarisse wat nog nie aansoek gedoen het nie, aangemoedig word om die stad te kontak.

# Die Verenigde Nasies se Internasionale Arbeidsorganisasie vra internasionale vennote om finansiële ondersteuning te verhoog vir ‘n werk-geleide herstelplan in die Palestynse gebied. Die oorlog en ekonomiese ontwrigting het broodwinning verwoes en werksgeleenthede vernietig. In Gaza het 252-duisend werksgeleenthede in die derde kwartaal van 2023 en 2025 verlore gegaan en werkloosheid het 85,1-persent bereik. Die ILO en Palestynse drieledige vennote is besig om ʼn program op te stel vir ordentlike werk en ʼn herstelprogram vir 2026-tot-2029, wat voorkeur gee aan indiensneming, herstel van sakeondernemings en arbeidsmarkbestuur. Dit fokus op vroue, die jeug en persone met gestremdhede.

# Rugby: Springbok-kaptein Siya Kolisi sê hulle is nie bekommerd oor hoe Frankryk se skakelpaar, kaptein Antoine Dupont en Maxime Lucu, hul Nasieskampioenskap-kragmeting vanaand in Parys sal beïnvloed nie. Suid-Afrika keer terug na die Stade de France, waar hulle Les Bleus in vyf agtereenvolgende wedstryde geklop het. Kolisi sê niemand wil beserings hê nie, maar elke span loop deur en spelers moet in ander posisies speel. Hy sê dis normaal in die sport.

# En die finansiële aanwysers: Die rand verhandel teen 16-rand-73-sent teen die dollar, 18-rand-51-sent teen die euro en 22-rand-16-sent teen die pond. Bitcoin verhandel teen 70-duisend-884-dollar. Die prys van goud is drie-duisend-908-dollar-85-sent per fynons en die prys van Brent-ruolie 97-dollar-52-sent per vat.

Bly ingeskakel vir meer nuus……………….