Nuus 07:00 (DGO)

BULLETIN 12 Junie 7 vm

Goeiemôre. Ek is……..

In die bulletin:

# Minister Creecy sê die brandstofbedryf is ‘n strategiese sektor
# Die Parlement doen ‘n beroep op die regering om die staalbedryf te red
# En sokker: die Bafana Bafana-afrigter sê hulle het nie hul teenstanders met aanvalle bedreig nie

# Die minister van Vervoer, Barbara Creecy, sê die brandstofbedryf moet nouer saam met die regering werk en sê dié bedryf se belangrikheid om die land se ekonomie aan die gang te hou, kan nie onderskat word nie. Sy het gister die Suid-Afrikaanse Brandstofbedryf-vereniging se jaarlikse imbizo in Sandton, Johannesburg, toegespreek. Creecy beklemtoon dat die land verbind is om ‘n gunstige omgewing te skep deur doeltreffende beleidsregulasie, beplanning om infrastruktuur te ontwikkel, en oorsig van instellings in staatsbesit wat in die vervoer- en logistieke sektor betrokke is.

# AfriForum sê die vertraging met die vrystelling van die nasionale wateraksieplan toon die regering se traagheid om op te tree terwyl die waterkrisis voortduur. Die organisasie beweer die plan is volgens berigte gefinaliseer en is selfs in die Parlement voorgelê, maar steeds nie bekend gemaak nie. Marais de Vaal van AfriForum sê die vertraging ondermyn die openbare vertroue en toon ‘n mislukking om planne te implementeer ten spyte van maatreëls oor instandhouding, aanspreeklikheid en anti-korrupsie. Hy sê daar is ‘n patroon van taakspanne en aksiekomitees terwyl die oplossing van die probleem agterweë bly.

# Die parlementêre portefeuljekomitee oor Handel, Nywerheid en Mededinging sê die regering moet dringend by die staalbedryf ingryp. Dié bedryf is toenemend onder druk weens swak ekonomiese groei, hoë elektrisiteitskoste, onvoldoende plaaslike vraag, goedkoop invoere en ʼn wêreldwye ooraanbod. Die komitee sê daar is ʼn behoefte aan doeltreffende en deeglike betrokkenheid by die sektor om ʼn duidelike, gekoördineerde, staatsgeleide strategie en ingryping te ontwikkel om hierdie bedryf te bestendig en te laat herleef. Hy sê die Departement van Handel, Nywerheid en Mededinging moet die staal-sektor red.

# Die DA sê Tshwane se onderburgemeester, Eugene Modise, vind steeds finansiële baat by Triotic Protection Services deur huurinkomste en aandeelverwante betalings, al het hy as direkteur van die maatskappy bedank. Die party beweer Modise kon geen bewys lewer van ‘n aandeelverkoopooreenkoms nie. Dit sou bewerings staaf hy nie meer ‘n belang in die maatskappy het nie. Jacqui Uys van die DA sê die maatskappy ontvang ongeveer drie-miljoen-rand per maand van die stad.

# Die Britse minister van Verdediging, John Healey, het bedank en beskuldig eerste minister Keir Starmer dat hy nie die verdediging-beleggingsplan behoorlik befonds nie. Hy is die sesde minister wat die afgelope maand uit Starmer se regering bedank. Healy sê in sy bedankingsbrief die land se verdediging-beleggingsplan skiet ver te kort van wat vereis word vir die verdediging van Brittanje in hierdie gevaarlike tyd. Hy sê Starmer en die Tesourie is onwillig om die hulpbronne beskikbaar te stel wat die land nodig het om homself in hierdie tyd van toenemende bedreigings te beskerm.

# Sokker: Bafana Bafana-afrigter, Hugo Broos, sê hulle het oor die algemeen goed gespeel in hul Wêreldbeker-openingswedstryd teen die mede-gasheerland, Mexiko, maar glo hulle aanvalle was nie dreigend genoeg nie. Julian Quinones en Raul Jimenez se doele het Mexiko se 2-0 oorwinning oor Suid-Afrika beklink in ʼn wedstryd waar drie rooi kaarte uitgedeel is. Bafana Bafana het die wedstryd met nege spelers klaargemaak nadat Sphephelo Sithole en Themba Zwane in die tweede helfte afgestuur is. Broos sê Zwane se rooi kaart was sag. Hy sê hulle het oorwegend ‘n goeie wedstryd gespeel behalwe dat hulle die bal soms verloor het.

# En die finansiële aanwysers: Die rand verhandel teen 16-rand-30-sent teen die dollar, 18-rand-84-sent teen die euro en 21-rand-85-sent teen die pond. Bitcoin verhandel teen 63-duisend-319-dollar. Die prys van goud is vier-duisend-188-dollar-75-sent per fynons en die prys van Brent ruolie 88-dollar-55-sent per vat.

Bly ingeskakel vir meer nuus……………….