Nuus 06:00 (DGO)

BULLETIN 4 Augustus 6 vm

Goeiemôre. Ek is……..

In die bulletin:

# Meer as negeduisend mense is gedurende die eerste kwartaal by Suid-Afrika se grensposte onderskep
# Die DA is vol vertroue dat Dunstan Mlambo die regbank en die oppergesag van die reg sal versterk
# En swem: Pieter Coetzé sluit die Wêreld-watersportkampioenskappe met drie medaljes af

# Die kommissaris van die Grensbestuursowerheid, Michael Masiapato, sê nege-duisend-954 persone is gedurende die eerste kwartaal van die 2025/2026-boekjaar onderskep, aangekeer en gedeporteer terwyl hulle probeer het om die land onwettig binne te kom. Masiapato sê vyf-duisend-826 het nie dokumente gehad nie, twee-duisend-127 kon nie toegelaat word nie en twee-duisend-en-een was ongewenste persone. Die kommissaris sê die meerderheid van die onderskepte en gedeporteerde individue was Basotho’s, Zimbabwiërs en Mosambiekers. Hy sê sedert die grensowerheid in 2022 gestig is, is meer as 490-duisend mense onderskep.

Masiapato sê ook 986 permitte vir menslike oorskot is gedurende die eerste kwartaal verwerk. Masiapato het in die owerheid se kwartaalverslag nuwe sekerheidsmaatreëls aangekondig wat by alle grensposte ingestel sal word. Die kommissaris sê 44 liggame is die land ingebring terwyl 942 die land verlaat het. Hy sê die publiek moet hul vergewis van die dokumente wat benodig word indien ‘n verasde persoon se oorskot oor ‘n grens vervoer word.

# Die DA sê die Suid-Afrikaanse Regbank het nou meer as ooit tevore sterk leierskap nodig, met die bedreiging van wetteloosheid wat hoogty vier. Dit volg op die aanstelling van regter Dunstan Mlambo as adjunkhoofregter. Glynnis Breytenbach van die DA sê Mlambo sal ‘n deurslaggewende rol speel om hoofregter Mandisa Maya te ondersteun in die vervulling van haar mandaat om ‘n sterk en bekwame regbank te bou. Sy sê hulle het volle vertroue dat Mlambo se onwrikbare benadering tot geregtigheid en billikheid deur die regbank sal uitkring.

# ActionSA in Johannesburg eis dat burgemeester Dada Morero rekenskap moet gee van meer as 24-miljard-rand se onreëlmatige en verkwistende uitgawes. Dit volg na ‘n skrywe van die minister van Finansies, Enoch Godongwana. Dit skets ‘n verdoemende prentjie van nie-nakoming van die Wet op Munisipale Finansiële Bestuur en katastrofiese vlakke van finansiële wanbestuur onder die huidige administrasie. Elmari Atterbury van ActionSA sê hulle verwelkom die minister se opdrag aan die burgemeester vir ‘n dringende verduideliking en plan van aksie.

# Israel se verregse minister van Nasionale Veiligheid, Itamar Ben-Gvir, het gramskap op die hals gehaal nadat hy ‘n groep aanbidders in gebede by die Al-Aqsa-moskee, die sensitiefste heilige plek in Jerusalem, gelei het. Dit is ten spyte van ‘n dekades oue reëling dat enigiemand die terrein mag besoek, maar slegs Moslems daar mag bid. Die Palestynse ministerie van Godsdienssake het Ben Gvir se besoek veroordeel en hom ‘n ekstremis genoem. Jordanië, ‘n beskermheer van die terrein, het die minister se besoek beskryf as ‘n onaanvaarbare uitlokking en ‘n blatante skending van internasionale reg.

# Swem: Die 21-jarige Pieter Coetzé het silwer in die 50-meter rugslag by die Wêreld-watersportkampioenskappe in Singapoer gewen om die byeenkoms met drie medaljes af te sluit. Hy het ook goud in die 100-meter rugslag en silwer in die 200-meter rugslag verower. Die Suid-Afrikaner het nog ‘n Afrika-rekordtyd van 24,17-sekondes aangeteken om die silwer met die Rus Pavel Samusenko te deel toe die paar die wal gelyktydig agter Rusland se Kliment Kolesnikov geraak het. Coetzé is die tweede Suid-Afrikaner, na Roland Schoeman, wat ‘n driedubbele medalje by ‘n wêreldkampioenskap wen.

# En die finansiële aanwysers: Die rand verhandel teen 18-rand-2-sent teen die dollar, 20-rand-87-sent teen die euro en 23-rand-92-sent teen die pond. Bitcoin verhandel teen 114-duisend-348-dollar. Die prys van goud is drie-duisend-355-dollar-61-sent per fynons en die prys van Brent ruolie 69-dollar-7-sent per vat.

Bly ingeskakel vir meer nuus……………….