Nuus 06:00

BULLETIN 9 Desember 6 vm

Goeiemôre. Ek is……..

In die bulletin:

# John Steenhuisen waarsku die afdanking van enige DA-ministers kan die einde van die regering van nasionale eenheid beteken
# Internasionale leiers verwelkom die val van die Assad-regering in Sirië
# En rugby: Die Blitsbokke kraai weer koning in Kaapstad

# Die DA sê hy verwerp enige poging deur ‘n faksie in die ANC om president Cyril Ramaphosa te oortuig om die minister van Basiese Onderwys, Siviwe Gwarube, of enige ander DA-minister af te dank bloot omdat hulle hul werk doen. Die party het gereageer op ‘n Sunday Times-berig dat Ramaphosa onder erge druk van binne die ANC was om Gwarube af te dank, ná weke se spanning oor die Wysigingswet op Basiese Onderwyswette. Die DA-leier, John Steenhuisen, sê die afdanking van Gwarube sal ‘n einde aan die regering van nasionale eenheid beteken:

# Die MK-party sê sy besluit om in die Nasionale Vergadering buite stemming te bly oor die Spesiale Begrotingswetsontwerp was op beginsels gegrond. Sipho Tyira van die MK-party sê hoewel die wetsontwerp ‘n toekenning van 100-miljoen-rand insluit, klaarblyklik vir die Internasionale Geregshofsaak om aan te wend vir sake oor Israelse misdade teen Palestyne, kon die party nie met ‘n rein gewete ‘n breër toedeling goedkeur wat die agenda van witmonopolie-kapitaliste steun nie:

# Die Grensbestuursowerheid sê sy operasies oor die naweek by die Beitbrug- en Lebombo-grensposte het uitgeloop op belangrike deurbrake met onwettige bedrywighede, waaronder mense- en kindersmokkelary. Die woordvoerder Mmemme Mogotsi sê wakker grenswagte by die Lebombo grenspos het Vrydag ‘n minibustaxi voorgekeer wat probeer het om 14 ongedokumenteerde kinders tussen die ouderdomme van 14 en 16 uit Mosambiek na Suid-Afrika te smokkel:

# WaterCAN sê daar is elke dag meer stories van waterchaos en desperate gemeenskappe, in Johannesburg en reg oor die land. Ferrial Adam van die organisasie vra die stad om dringende oplossings te kry vir die waterkrisis. Sy sê die toewyding en bronne wat gebruik word om mense se ontkoppel behoort ook gerig te word op die ouditering van regeringsgeboue vir lekplekke, vermorsing en water waarvoor nie betaal word nie:

# Verskeie wêreldleiers het die nuus verwelkom dat die Siriese president Bashar al-Assad se bewind na byna 25 jaar beëindig is. Dit volg nadat rebelle die hoofstad Damaskus binnegeval en die stad bevry het. Die Israelse premier Benjamin Netanyahu sê die ineenstorting is die regstreekse gevolg van sy land se kragtige optrede teen Hizbollah en Iran. Die Britse premier Keir Starmer sê hy verwelkom die val van al-Assad se barbaarse regime en het gevra vir vrede en bestendigheid in die land. Die Oekraïnse minister van Buitelandse Sake, Andriy Sybiga, vra vir ‘n vreedsame eerder as militêre oorgang.

# Rugby: Die Blitsbokke het Frankryk met 26-14 verslaan om die Kaapstad-sewesreeks vir die eerste keer sedert 2015 te wen. Die gashere het vier drieë gedruk deur Donovan Don, Zain Davids, Shilton van Wyk en David Brits. Fidji het die bronsmedalje gewen nadat hulle Spanje met 47-10 in die uitspeelronde om die derde plek gewen het – ‘n herhaling van verlede naweek in Dubai. In die vrouekompetisie is Nieu-Seeland as kampioen gekroon nadat sy die VSA met 26-12 geklop het, en Frankryk het die bronsmedalje verower nadat sy Australië met 17-14 verslaan het.

# En die finansiële aanwysers: Die rand verhandel teen 18-rand-3-sent teen die dollar, 19-rand-7-sent teen die euro en 22-rand-99-sent teen die pond. Bitcoin verhandel teen 100-duisend-505-dollar-15-sent. Die prys van goud is twee-duisend-633-dollar-30-sent per fynons en die prys van Brent ruolie 71-dollar per vat.

Bly ingeskakel vir meer nuus……………….