Nuus 13:00

BULLETIN 28 Julie 1 nm

Goeiemiddag. Ek is……..

In die bulletin:

# Regte Madlanga verstrek vandag inligting oor die kommissie van ondersoek na Mkhwanazi se bewerings
# Die gewese Mosambiekse president Joachim Chissano waarsku bevrydingsbewegings het hul mensefokus verloor
# En tennis: De Minaur en Fernandez is die kampioene in Washington

# Die waarnemende adjunkhoofregter, Mbuyiseli Madlanga, sal vandag besonderhede gee oor die kommissie van ondersoek na die KwaZulu-Natalse polisiekommissaris Nhlanhla Mkhwanazi se bewerings van politieke inmenging in ondersoeke. President Cyril Ramaphosa het Madlanga aangewys as voorsitter van die ondersoek na vermeende indringing deur misdaad-sindikate in wetstoepassing. Die minister van Polisie, Senzo Mchunu, en die adjunkkommissaris vir misdaadopsporing, Shadrack Sibiya, is op spesiale verlof geplaas. Intussen sal die Konstitusionele Hof Donderdag ‘n spesiale sitting vir Madlanga hou voor sy amptelike aftrede.

# Die Vereniging van Staatsampenare moedig alle belastingbetalers aan om by belastingregulasies te hou en hulle belastingopgawes betyds in te dien. Voorlopige belastingbetalers het tot 19 Januarie om hulle opgawes in te dien. Die vakbond se woordvoerder, Reuben Maleka, waarsku ook die publiek teen kubermisdadigers wat vals e-posse, SMSe en WhatsApp-boodskappe stuur, wat verklaar dat hulle die Inkomstediens verteenwoordig. Maleka waarsku dat dit kan lei tot identiteitsdiefstal, ongemagtigde toegang tot bankrekeninge en finansiële bedrog.

# Oudpresident Joaquim Chissano van Mosambiek sê Afrika se bevrydingsbewegings het afgedwaal van hul kernbelofte om die mense te dien. Hy het tydens die ANC-bevrydingsbewegingsberaad in Johannesburg besin oor vorige foute, insluitend verswakte demokratiese instellings, die wegbeweeg van landsburgers en die snoer van meningsverskille. Chissano vra hernude toewyding aan die jeug, vroue en inklusiewe regering, en het leiers aangespoor om die nalatenskap van Afrika se bevrydingshelde te eerbiedig:

# Tennis: Die Australiër Alex de Minaur skryf sy oorwinning in die Washingtonse Ope toe aan sy geestelike vermoë en ingesteldheid. Die 26-jarige De Minaur het drie wedstrydpunte afgeweer voor hy die Spanjaard Alejandro Davidovich Fokina in die eindstryd geklop het vir sy tiende titel op toervlak. De Minaur is nou agste op die wêreldranglys. In die vroue-afdeling het Leylah Fernandez van Kanada met Anna Kalinskaya van Rusland afgereken om die belangrikste titel van haar loopbaan te verower.

# Die finansiële aanwysers: Die rand verhandel teen 17-rand-84-sent teen die dollar, 20-rand-85-sent teen die euro en 23-rand-96-sent teen die pond. Bitcoin verhandel teen 118-duisend-935-dollar. Die prys van goud is drie-duisend-339-dollar-20-sent per fynons en die prys van Brent-ruolie is 68-dollar-18-sent per vat.

# En laastens, die twaalfde Suid-Afrikaanse Internasionale Balletkompetisie gesteun deur die Nasionale Loterykommissie, begin hierdie week in die Kunstekaap-teater in Kaapstad. Die kompetisie het drie ouderdomskategorieë in klassieke ballet en moderne kategorieë: 9 tot 12, 13 tot 16, en 17 tot 22. Vanjaar se jurielede is van Suid-Afrika, China, Kanada, Suid-Korea, Switserland, België en Amerika. Thomas Walters van die DA in die Wes-Kaap sê hierdie kompetisie is ‘n toonbeeld van uitnemende kuns:

Bly ingeskakel vir meer nuus……………….