Nuus 06:00

BULLETIN 24 Augustus 6 vm

Goeiemôre. Ek is……..

In die bulletin:

# President Ramaphosa stel die ANC se verkiesingsmanifes bekend
# Professor Jonathan Jansen waarsku Suid-Afrikaanse universiteite gaan gebuk onder ‘n bestuurskrisis
# En rugby: Die Cheetahs klop Boland om ’n Curriebeker-tuishalfeindstryd te verseker

# Die president van die ANC, Cyril Ramaphosa, sê die party se manifes sit ses sleutelaksies uiteen wat daarop gemik is om plaaslike regering reg te stel, basiese dienste te verbeter en munisipaliteite te bou wat vir die mense werk. Hy het gister die ANC se 2026-verkiesingsmanifes vir plaaslike regering by Riversidepark in Diepsloot, noord van Johannesburg, bekendgestel. Die ses prioriteite sluit in, die verskaffing van basiese dienste, die versekering van gesonde munisipale finansies en die bou van munisipaliteite wat na inwoners luister. Ramaphosa sê die manifes weerspieël die stem van Suid-Afrikaners:

Ramaphosa sê ook die party aanvaar verantwoordelikheid vir beide die vordering wat hy gemaak het en sy regeringstekortkominge. Ramaphosa sê die ANC sal nie vlug voor die uitdagings wat munisipaliteite in die gesig staar nie, insluitend onbetroubare dienste, verswakkende infrastruktuur, swak leierskap, korrupsie en die aanstelling van mense sonder die vereiste vaardighede. Hy sê die vertroue van mense kan nie geërf word nie; dit moet verdien word:

# Die voormalige rektor van die Universiteit van die Vrystaat, professor Jonathan Jansen, sê Suid-Afrika se universiteite beleef herhalende bestuurskrisisse ten spyte van die feit dat die land se slimste denkers daar is. In sy meningsartikel op News24 wys Jansen op onbestendigheid by verskeie instellings en waarsku die gevolge strek verder as leierskapsgeskille tot by onderrig en navorsing. Hy wys daarop dat Suid-Afrika se 26 openbare universiteite meer as 110-miljard-rand in inkomste verteenwoordig, maar verskeie van hulle ervaar telkens ernstige uitdagings tydens die akademiese jaar.

# Die Stad Tshwane het bewerings verwerp dat sy 2026/27-begroting ‘n diensstaattekort van twee-miljard-rand in die gesig staar. Die stad sê die syfer weerspieël die verskil tussen ‘n aanvanklike departementele versoek en die finaal-goedgekeurde toewysing. Tshwane sê ongeveer 13-miljard-rand is goedgekeur na bekostigbaarheidsoorsigte, insluitend 229-miljoen-rand vir die vul van vakatures en 362-miljoen-rand vir terugwerkende salarisaanpassings. Die stad sê die toewysing is voldoende vir die verwagte personeelkoste, met besteding wat deur die boekjaar noukeurig gemonitor sal word.

# Rugby: Die Cheetahs en die Griekwas het nou beide ‘n Curriebeker-tuishalfeindstryd verseker, na ‘n moeilike oorwinning van 33-24 teen ‘n swak gedissiplineerde Boland Kavaliers in Bloemfontein. Die besoekers, wat met rustyd 10-7 voor was, het binne tien minute vier geel kaarte ontvang. Michael Annie het twee van die Cheetahs se vyf drieë gedruk om die oorwinning te verseker. Die Griekwas is bo-aan die punteleer met 26 punte, gelyk met die Cheetahs, maar voor op punteverskil. Volgende naweek se laaste groepsronde sal bepaal wie bo-aan eindig.

# Die finansiële aanwysers: Die rand verhandel teen 16-rand teen die dollar, 18-rand-69-sent teen die euro en 21-rand-83-sent teen die pond. Bitcoin verhandel teen 77-duisend-659-dollar. Die prys van goud is vier-duisend-615-dollar-52-sent per fynons en die prys van Brent-ruolie 94-dollar-67-sent per vat.

# En laastens, as jy gedink het die Olimpiese Spele het ongewone oomblikke, welkom by die Wêreldspele vir Mensagtige Robotte in Beijing. Meer as tweeduisend robotte uit 16 lande neem deel aan 51 items, wat wissel van atletiek en sokker tot dans en praktiese take. Die gepaardgaande Wêreldrobotkonferensie verteenwoordig meer as 300 maatskappye en duisende robotprodukte. Onder die sterre is ‘n robotperd met ‘n ruiter, terwyl ander masjiene dans, musiek maak en saam met mense aan sport deelneem. Die toekoms is hier, en dis verbasend besig!

Bly ingeskakel vir meer nuus……………….