Nuus 17:00

BULLETIN 22 Julie 5 nm

Goeiemiddag. Ek is……..

In die bulletin:

# Standard Bank verwag môre ‘n moontlike rentekoersverhoging
# Andrea Johnson erken die Ondersoekdirektoraat het Fadiel Adams se beëdigde verklaring teen Khumalo aangevra
# En, die Wes-Kaapse LUR vra ondernemings om aansoek te doen vir uitvoermededingendheidsprogram  

# Standard Bank verwag die Suid-Afrikaanse Reserwebank se Monetêre Beleidskomitee gaan môre ‘n verdere rentekoersverhoging oorweeg. Inflasie het in Junie tot vyf-persent gestyg vanaf 4,5-persent in Mei, hoofsaaklik aangedryf deur hoër brandstofpryse en openbare vervoerkoste. Dit beteken inflasie bly ver bo die Reserwebank se teiken van drie-persent. Elna Moolman van die bank sê enige verdere verhoging sal waarskynlik die einde van die huidige rentekoersverhogingsiklus aandui:

# Die hoof van die Ondersoekdirektoraat Teen Korrupsie, Andrea Johnson, het aan die Madlanga-kommissie gesê die direktoraat het ‘n Artikel 27-beëdigde verklaring van parlementslid Fadiel Adams aangevra en ontvang. Johnson sê dit was nadat ‘n verwysingsbrief van die geskorste minister van Polisie, Senzo Mchunu, se kantoor ontvang het. Johnson het aan die voorsitter van die kommissie, Mbuyiseli Madlanga bevestig die minister se brief alleen was nie genoeg om ‘n ondersoek teen die hoof van Misdaadintelligensie, Dumisani Khumalo te aktiveer nie.

# Build One South Africa het die besluit deur die minister van Finansies, Enoch Godongwana verwelkom om die verwydering van die direksie van die Openbare Beleggingskorporasie te oorweeg. Die leier van BOSA, Mmusi Maimane, sê die stap erken diepgaande bestuursmislukkings by die instelling. Graham Charters van die party vra ‘n onafhanklike tussentydse raad, ‘n forensiese ondersoek, openbare bekendmaking van bevindinge en sterker parlementêre toesig. Hy sê omvattende institusionele hervorming is nodig om vertroue in die korporasie te herstel.

# Die Wes-Kaapse LUR vir Landbou, Ekonomiese Ontwikkeling en Toerisme, Ivan Meyer, moedig ondernemings aan om aansoek te doen vir die uitvoermededingsprogram, wat ondernemings wil help om hul teenwoordigheid op internasionale markte uit te brei. Die program bied ondersteuning met die voldoening aan internasionale standaarde, die verbetering van produkte, uitvoernakoming, e-handel en die uitbreiding van produksievermoëns. Meyer sê groter uitvoere is die sleutel tot werkskepping, die lok van beleggings en die groei van die provinsiale ekonomie.

# Krieket: Die Australiese sterspeler David Warner het in ‘n hof in Sydney skuldig gepleit aan drink-en-bestuur. Hy is beskuldig dat hy op 5 April bestuur en voor ‘n padversperring stilgehou het voor hy ‘n asemtoets moes ondergaan, in hegtenis geneem en na ‘n polisiestasie toe geneem is. Die gewese aanvangskolwer, wat Sydney Thunder in Australië se T20 Big Bash League aanvoer, het nie in die hof verskyn nie. Hy word op 18 Augustus gevonnis.

# En die finansiële aanwysers: Die rand verhandel teen 16-rand-47-sent teen die dollar, 18-rand-78-sent teen die euro en 21-rand-99-sent teen die pond. Bitcoin verhandel teen 65-duisend-582-dollar. Die prys van goud is vier-duisend-117-dollar-99-sent per fynons en die prys van Brent ruolie is 90-dollar-57-sent per vat.

Bly ingeskakel vir meer nuus……………….