Nuus 06:00

BULLETIN 9 Junie 6 vm

Goeiemôre. Ek is……..

In die bulletin:

# President Ramaphosa sê Suid-Afrika sal ‘n ferm maar billike benadering tot migrasie volg
# Benjamin Netanyahu sê Israel gaan ‘vir eers’ ophou om Iran aan te val
# En rugby: Phepsi Buthelezi en Carlu Sadie word opgeroep na die Bok-oefenkamp

# President Cyril Ramaphosa sê die regering se reaksie volg op die opregte kommer wat Suid-Afrikaners uitgespreek het oor onwettige migrasie en die uitwerking daarvan op die land. Oor die afgelope weke was daar verskeie protesoptogte teen onwettige immigrasie regoor die land. In sy weeklikse nuusbrief herhaal Ramaphosa dat die regering deur die Omvattende Benadering vir Migrasiebestuur optree teen immigrasie-, arbeids- en ander wetsoortredings. Hy sê deur wette te versterk en dit billik af te dwing, kan die regering onwettige immigrasie aanpak en getrou bly aan die Grondwet en menslikheid.

# Die leier van Rise Mzansi, Songezo Zibi, het die party se besluit verdedig om ‘n lening van 30-miljoen-rand af te skryf deur dit as ‘n skenking te verklaar in lyn met politieke befondsingswette. Die lening is gebruik om die party se verkiesingsveldtog in 2024 te finansier en afgeskryf nadat die party nie die oorblywende skuld kon terugbetaal nie, ten spyte van ‘n terugbetaling van meer as een-miljoen-rand. Zibi verwerp bewerings van ongerymdhede, aangesien die wet skenkings deur organisasies toelaat:

# Die Suid-Afrikaanse Agentskap vir Maatskaplike Sekerheid sê kommer by sy Soweto-kantoor in Maponya-winkelsentrum in Gauteng oor die wanbetaling van maatskaplike toelaes hou verband met ‘n deurlopende, wetlik-vereiste hersieningsproses. Lungelo Mkamba van die agentskap sê die proses is bedoel om voortgesette geskiktheid te bevestig en lei nie outomaties tot kansellasies nie, aangesien begunstigdes die kans kry om hul besonderhede te verifieer en dokumente in te dien voordat enige besluit geneem word:

# Die Israelse premier Benjamin Netanyahu sê sy land sal vir eers aanvalle op Iran staak, maar waarsku dat hulle kragtig sal reageer as aanvalle hervat. Israel en Iran het mekaar vir die eerste keer sedert die skietstilstand in April aangeval. Netanyahu sê nadat die Iran-gesteunde militante groep Hisbolla op Israelse gebied gevuur het, het hy die Israelse Weermag beveel om terroriste-teikens in die Libanese hoofstad, Beiroet, aan te val en Hisbolla-agente daar uit te skakel. Hy sê Israel het die reg op selfverdediging.

# Rugby: Die losvoorspeler Phepsi Buthelezi en stut Carlu Sadie is opgeroep vir die Springbokke se oefengroep in Johannesburg. Die twee sal deur die Stormers-spelers vergesel word na hul Verenigde Rugbykampioenskap-halfeindnederlaag teen Leinster. Buthelezi, wat vir die Sharks speel en sy toetsdebuut teen Portugal in 2024 gemaak het, het gister vir diens aangemeld, terwyl Sadie, wat vir die Europese kampioene Bordeaux Bègles speel, môre by die kamp sal aansluit. Bok-afrigter Rassie Erasmus sê hy is vol vertroue dat Buthelezi en Sadie met gemak in die groep sal inpas.

# Die finansiële aanwysers: Die rand verhandel teen 16-rand-50-sent teen die dollar, 19-rand-3-sent teen die euro en 22-rand-1-sent teen die pond. Bitcoin verhandel teen 63-duisend-279-dollar. Die prys van goud is vier-duisend-325-dollar-97-sent per fynons en die prys van Brent ruolie 93-dollar-3-sent per vat.

# En ten slotte: BMW brei proefprojekte uit met behulp van mensagtige robotte by sy aanlegte in Duitsland en die Verenigde State as deel van pogings om produktiwiteit deur kunsmatige intelligensie te verhoog. Die maatskappy sê die robotte word getoets vir eentonige, fisiek veeleisende en presisiewerk in die vervaardiging van voertuie en batterye. BMW het positiewe resultate behaal met toetse in Suid-Carolina, waar robotte gehelp het met die vervaardiging van meer as 30-duisend voertuie. Die maatskappy sê egter sy Rosslyn-aanleg in Pretoria sal waarskynlik nie in die afsienbare toekoms sulke robotte ontplooi nie.

Bly ingeskakel vir meer nuus……………….