Sportnuus 12:30

BULLETIN SPORTNUUS 2 Februarie 12:30 nm

Goeiemiddag. Ons kyk na die jongste sportnuus en uitslae:

# Ons begin met rugby: Vier Junior Springbokke wat reeds hulle nasionale kleure ontvang het, Zachary Porthen, JF van Heerden, Litelihle Bester en Jurenzo Julius, is onder die 35 spelers wat van Maandag die SA Rugby-akademie se program op Stellenbosch bywoon. Dit is om gereed te maak vir die internasionale seisoen wat die eerste Onder 20-rugbykampioenskap in Australië en Wêreldrugby se Onder 20-kampioenskap in Suid-Afrika insluit. Afrigter Bafana Nhleko sê hulle is tevrede met die groep se samestelling, naamlik 21 voorspelers en 14 agterspelers, en voeg by die harde werk sal nou in alle erns begin.

Nog rugby: Die losskakel, Finn Russell, voer Skotland aan in môre se Sesnasieswedstryd teen Wallis in die Millennium-stadion in Cardiff. Kyle Rowe trek die eerste keer die nommer 15-trui oor die kop in die plek van die beseerde Blair Kinghorn. Die 34-jarige slot, Richie Gray, speel in sy elfde kampioenskap, terwyl die gebore Suid-Afrikaner, Kyle Steyn, op vleuel uitdraf. Frankryk en die verdedigende kampioen, Ierland, skop die kampioenskap vanaand in Marseille af, terwyl Italië môremiddag vir Engeland in Rome verwelkom.

# Vervolgens, krieket: Die tafel is gedek vir ‘n opwindende kragmeting op die Adelaide Oval wanneer die Protea-vrouespan Australië môre in die eerste van drie internasionale eendagwedstryde takel. Die onlangse T20-reeks tussen die twee spanne was baie mededingend en het met twee-een in die tuisspan se guns geëindig. Die Protea-kaptein, Laura Wolvaardt, speel vir die Adelaide Strikers in die vroue se Big Bash-liga in Australië. Sy sê haar ervaring met die plaaslike toestande sal hopelik waardevol wees vir die span:

Nog krieket: M-I Cape Town het die Pretoria Capitals met 34 lopies verslaan in hulle SA20-kragmeting in Centurion. Ryan Rickelton wat die toernooi se voorste lopie-maker is, het 90 van 45 balle aangeteken, en ʼn aanvangsvennootskap van 64 lopies met Rassie van der Dussen behaal. Dit het bygedra tot M-I Cape Town se telling van 248 vir vier. Daarna het Kyle Verreynne ‘n onoorwonne 116 behaal wat die hoogste telling ooit in die toernooi is. Dit was egter nie genoeg vir die Pretoria Capitals nie en hulle kon in 20 boulbeurte net 214 vir agt bymekaar skraap.

# Ons sluit af met motorsport: Mercedes het bevestig die sewemalige Formule Een-kampioen, Lewis Hamilton, sal die span aan die einde van die seisoen verlaat om by Ferrari aan te sluit. Hy het die vrystellings-keuse gebruik wat deel was van die kontrak wat hy verlede Augustus onderteken het. Die Brit het sedert die 2013-seisoen vir die Silver Arrows gejaag en ses van sy sewe wêreldtitels saam met die span gewen. Hamilton sê sy besluit om weg te gaan was een van die moeilikste, maar die tyd is reg om ʼn nuwe uitdaging aan te pak. Hy sluit volgende seisoen met ʼn veeljarige kontrak by Ferrari aan.

Bly ingeskakel vir meer nuus……………….