Sportnuus 12:30

BULLETIN SPORTNUUS 1 Februarie 12:30 nm

Goeiemiddag. Ons kyk na die jongste sportnuus en uitslae:

# Krieket is eerste aan die beurt: Die verdedigende kampioen, Sunrisers Eastern Cape, het hulle plek in die SA20 se uitspeelronde verseker met ‘n bonuspunt-oorwinning van nege paaltjies oor die Joburg Super Kings op die Wanderers. Dan Worrall van Australië het drie paaltjies laat kantel en die tuisspan is uitgeboul vir net 78. Die Sunrisers het daarna gemaklik lopies aangeteken met die Engelse paar, Dawid Malan en Tom Abell, wat ‘n onoorwonne tweedepaaltjie-vennootskap van 50-lopies behaal het. Worrall sê hulle het ʼn veelsydige span wat hulle in ʼn goeie posisie plaas:

# Nou, rugby: SA Rugby het Peter Jooste as die nuwe administrateur van die Westelike Provinsie Rugbyunie aangestel. Hy volg Max Fuzani op, wat uitgetree het ná sy aanstelling as spesiale raadgewer vir die minister van Sport, Kuns en Kultuur, Zizi Kodwa. Die runie is sedert Oktober 2021 onder administrasie en het groot skuld, wat blykbaar meer as 500-miljoen-rand beloop. Die president van SA Rugby, Mark Alexander, het Jooste bedank dat hy die rol oorgeneem het om die unie uit administrasie te lei.

# Vervolgens, gholf: Die PGA-toer het ʼn ooreenkoms van sowat 56-miljard-rand gesluit met Strategic Sports Group, gelei deur die premierligaspan Liverpool se eienaars, Fenway Sports Group. Spelers wat getrou gebly het aan die toer en nie toegegee het aan die Saoedi-ondersteunde LIV Golf nie, gaan onmiddellike en toekomstige aandele van 28-miljard-rand ontvang. Die fondse sal aan spelers beskikbaar gestel word volgens loopbaanprestasies, onlangse suksesse en deelname in die toekoms. Die wêreld se voormalige nommer een, Jordan Spieth, sê hierdie belegging kan die PGA-toer in sy sterkste posisie ooit plaas:

# Nuus van die Olimpiese Spele: Die Franse regering het bekendgemaak daar is ʼn beperking op die aantal toeskouers by die openingseremonie van die Spele in Parys, as gevolg van kwessies soos sekerheid en ander organisatoriese uitdagings. Slegs 300-duisend mense sal op die oewers van die Seine toegelaat word wanneer die plegtigheid op 26 Julie op bote op die beroemde rivier plaasvind. Die minister van Binnelandse Sake, Gerald Darmanin, sê 100-duisend kaartjies is reeds verkoop vir plekke met die beste uitsig, terwyl nog 200-duisend toeskouers gratis toegang tot die boonste oewer sal hê.

# En, ons sluit af met motorsport: Formule Een het die Andretti-span se aansoek verwerp om in 2025 of 2026 by die sport aan te sluit. Die aansoek is ingedien deur die voormalige McLaren-renjaer Michael Andretti en sy pa, Mario, wat in 1978 die wêreldkampioen was, en is deur die beheerliggaam FIA goedgekeur. Die sport se handelsreg-houer, F1, sê egter hulle assessering het vasgestel die deelname van ʼn elfde span sal op sy eie nie waarde tot die kampioenskap toevoeg nie. Die liggaam laat wel die deur oop vir toelating in 2028.

Bly ingeskakel vir meer nuus……………….