Sportnuus 12:30

BULLETIN SPORTNUUS 31 Januarie 12:30 nm

Goeiemiddag. Ons kyk na die jongste sportnuus en uitslae:

# Ons skop af met sokker: Suid-Afrika is deur na die kwarteindronde van die Afrikabekertoernooi in die Ivoorkus nadat hy een van die gunstelinge, Marokko, verslaan het. Evidence Makgopa se doel in die 57ste minuut en ‘n vry-skop van Teboho Mokoena in die vyfde minuut van bykomende tyd het bygedra tot Bafana Bafana se sege oor die Marokkane, wat in 2022 die halfeindronde van die Wêreldbekertoernooi gehaal het. Suid-Afrika speel Saterdag teen die Kaap Verdiese Eilande vir ŉ plek onder die laaste vier. Afrigter Hugo Broos sê dit was spesiaal om Afrika se topspan te klop:

# Krieket is tweede: Durban’s Super Giants het hulle plek onder die toptwee op die SA20-punteleer verseker met ŉ oorwinning van agt lopies oor Pretoria Capitals op Kingsmead. Die speler van die wedstryd, Matthew Breetzke, het 73 van 46 balle gemoker en die Super Giants het 174 vir nege aangeteken. Daarna het snelbouler Junior Dala die beste syfers van sy loopbaan behaal met vyf vir 26 lopies om die Pretoria Capitals tot 166 vir nege te beperk. Dala sê hulle dra hierdie momentum oor na Saterdag se kragmeting met die Joburg Super Kings:

# Vervolgens, gholf: Die viermalige Major-wenner, Rory McIlroy, sê dit is belangriker om ‘n samesmelting tussen die PGA-toer en LIV Golf te voltooi as wat dit is om strawwe uit te deel vir oorlopers na die Saoedi-gesteunde toernooi. Hy keer môre terug na PGA Toer-aksie op die Pebble Beach Pro-Am-toernooi in Kalifornië. Tyrrell Hatton van Engeland is die jongste hoëprofiel-speler wat hom by LIV Golf aangesluit het. McIlroy sê hoe vinniger die samesmelting plaasvind en die beste spelers verenig, hoe beter vir die sport:

# Rugby: Die losskakel Marcus Smith het ŉ kuitbesering en is nie Saterdag beskikbaar vir Engeland se eerste Sesnasies-wedstryd teen Italië in Rome nie. Hy het die besering Maandag tydens oefening opgedoen. Dit beteken George Ford en die nuweling Fin Smith is afrigter Steve Borthwick se enigste losskakel-keuses. Engeland moet reeds klaarkom sonder die beseerde senters Ollie Lawrence en Manu Tuilagi, die agterspeler Tom Curry en die vleuel Anthony Watson. Hulpafrigter Kevin Sinfield sê hulle wag op ŉ tweede mening oor Smith om te bepaal hoe lank hy buite aksie gaan wees.

# En ten slotte: Verlede jaar se Wêreldbekertoernooi in Frankryk was die rugbygeleentheid wat die meeste kykers in die geskiedenis gelok het, en Suid-Afrika het ŉ sleutelrol gespeel in daardie sukses. Volgens Wêreld-Rugby was daar ŉ styging van 19-persent in die kykertal in vergelyking met 2019 se toernooi in Japan. Die pronkstuk het ŉ ongelooflike 1,33-miljard kyker-ure behaal. Die Springbokke het bygedra tot die hoogste wêreldwye kykertal van 481-miljoen kyker-ure. Die eindstryd tussen die Bokke en die All Blacks het ŉ nuwe rekord opgestel met 94-miljoen kyker-ure.

Bly ingeskakel vir meer nuus……………….