Nuus 18:00
BULLETIN NUUSAGENTSKAP 2 April 6 nm
Goeiemiddag. Ek is……..
In die bulletin:
# Die speaker sê sy is gereed om haarself aan die polisie oor te gee
# Die DA eis ‘n onmiddellike debat en stemming oor die wantrouemosie teen Mapisa-Nqakula
# En, tennis: Die nuwe wêreld nommer twee, Jannik Sinner, wil sy kleibaanvorm verbeter
# Die speaker van die Nasionale Vergadering, Nosiviwe Mapisa-Nqakula, sê sy is gereed om haarself van môre af aan die polisie oor te gee. Dit volg nadat die Hooggeregshof in Pretoria haar dringende aansoek teen inhegtenisneming verwerp het. Sy word aangekla van korrupsie oor miljoene rand wat sy na bewering van ‘n maatskappy met Weermagkontrakte ontvang het toe sy minister van Verdediging en Militêre Veterane was. Regter Sulet Potterill het gesê Mapisa-Nqakula het oorgenoeg tyd gehad om haarself oor te gee, maar het twee weke lank versuim om dit te doen.
Die DA dring intussen aan dat die debat en stemming oor die mosie van wantroue in Mapisa-Nqakula so gou moontlik moet plaasvind. Die party meen die Parlement moet die speaker aanspreeklik hou. Woordvoerder Siviwe Gwarube hou vol die integriteit en geloofwaardigheid van die Nasionale Vergadering is op die spel:
# Verbruikers gaan vanaf middernag meer moet opdok vir brandstof, wanneer 93- en 95-oktaan petrol onderskeidelik met 65-sent en 67-sent per liter styg. Dieselpryse sal in die binneland met drie-sent per liter toeneem, en langs die kus met vier-sent per liter daal. Lampolie-pryse sal oral met tussen 26-sent en 29-sent per liter daal. Die aanpassings word toegeskryf aan skommelings in die internasionale prys van petroleumprodukte, insluitend die rand- en die dollar-wisselkoers.
# ‘n Twaalfjarige het vandag losgebrand by ‘n skool noord van die Finse hoofstad, Helsinki, en ‘n mede-leerder doodgeskiet en twee ander ernstig beseer voordat hy in hegtenis geneem is. Die skool, genaamd Viertola, in Finland se vierde grootste stad, Vantaa, het ongeveer 800 leerders en 90 personeellede. Kinders in graad een tot nege, of van sewe- tot 15-jaar-oud, woon die skool by. Die polisie het vroeër gesê die verdagte en die beseerdes is almal 12-jaar-oud. Die polisie ondersoek ‘n saak van moord en poging tot moord.
# Tennis: Die kleibaanseisoen is op hande met die kwalifiserende rondes vir die Monte Carlo Meesters wat hierdie naweek afskop. Die Italianer, Jannik Sinner, is tans die speler met die beste vorm. Hy het verlede naweek die Miami-ope gewen en opgeskuif na ‘n loopbaan-beste wêreld nommer twee, na Novak Djokovic van Serwië. Die 22-jarige het in die verlede ietwat kleigetrap op kleibane, maar wil hierdie seisoen verbeter:
# En die finansiële aanwysers: Die rand verhandel teen 18-rand-79-sent teen die dollar, 20-rand-24-sent teen die euro en 23-rand-60-sent teen die pond. Bitcoin verhandel teen 65-duisend-662-dollar-51-sent. Die prys van goud is twee-duisend-271-dollar-42-sent per fynons en die prys van Brent-ruolie 88-dollar-29-sent per vat.
Bly ingeskakel vir meer nuus……………….