Nuus 18:00

BULLETIN 29 Julie 6 nm

Goeiemiddag. Ek is……..

In die bulletin:

# Minister Macpherson oorhandig ‘n verslag oor ‘n korrupte suurstoftender aan die Valke vir ondersoek
# Amerika bevind dat plaasmoorde nie gewone misdade is nie
# En die sitrusbedryf pleit vir Ramaphosa se ingryping met die Amerikaanse tariewe wat uitvoere bedreig 

# Die minister van Openbare Werke en Infrastruktuur, Dean Macpherson, het ‘n verdoemende verslag oor ‘n suurstoftender ter waarde van 800-miljoen-rand aan die Valke oorhandig om strafregtelik te ondersoek. PricewaterhouseCoopers het die verslag saamgestel waarin bedrog, onreëlmatige verkryging en bestuursmislukkings deur die Onafhanklike Ontwikkelingstrust blootgelê word. Macpherson het op ‘n nuuskonferensie gesê kontrakte ter waarde van 428-miljoen-rand is aan een van die ondernemings, Bulkeng, toegeken al is ‘n bedrieglike lisensie van die Suid-Afrikaanse Reguleringsowerheid vir Gesondheidsprodukte gebruik:

# AfriForum vra president Cyril Ramaphosa om sterk standpunt in te neem oor plaasmoorde. Dit volg op ‘n verslag van die Amerikaanse regering wat sê plaasmoorde in Suid-Afrika is nie gewone misdaad nie. Die verslag kritiseer politici vir hulle stilte. Jacques Broodryk van AfriForum het Ramaphosa versoek om die kreet ‘Kill the Boer’ in die openbaar te veroordeel en voorkeur te gee aan plaasmoorde om plattelandse gemeenskappe te beskerm en wet en orde te herstel:

Die Sitruskwekersvereniging waarsku intussen Suid-Afrika se sitrus-bedryf kan reuse-verliese te wagte wees indien ‘n nuwe Amerikaanse invoertarief van 30-persent Vrydag in werking tree. Die vereniging sê boorde van ongeveer een-duisend hektaar kan onlewensvatbaar word, wat duisende werksgeleenthede in die Wes- en die Noord-Kaap in gevaar sal stel, aangesien meer as sewe-miljoen kartonne sitrusprodukte jaarliks na Amerika uitgevoer word. Die vereniging pleit vir Ramaphosa se ingryping en vra dat hy ‘n verlenging of vrystelling verseker. Die vereniging waarsku die tarief kan die landelike ekonomie laat ineenstort en die sitrusvoorsieningsketting ontwrig.

# Die DA in Gauteng het die LUR vir Onderwys, Matome Chiloane, gevra om op te hou met wat die party noem die vervolging van Pretoria High School for Girls se skoolhoof, Philippa Erasmus. Die party se provinsiale woordvoerder oor Onderwys, Sergio Isa dos Santos, sê Erasmus is onregverdig skuldig bevind nadat haar man aangebied het om gratis landskap-dienste te lewer. Die DA sê die departement voer ‘n politieke vendetta en eis dat die besluit omgekeer word om billike regering te herstel:

# Krieket: Mitchell Santner sal Nieu-Seeland aanvoer in die eerste toets teen Zimbabwe wat môre in Bulawayo begin terwyl Tom Latham nog sukkel met ‘n skouerbesering. Die aanvangskolwer sal by die span bly met die hoop om fiks te wees wanneer die tweede toets volgende Donderdag begin, ook in Bulawayo. Santner het die Swartpette tot ‘n oorwinning gelei in die onlangse driehoekige T20-reeks teen Zimbabwe en Suid-Afrika. Dit is Nieu-Seeland se eerste toetsreeks in Zimbabwe sedert 2016.

# En die finansiële aanwysers: Die rand verhandel teen 17-rand-95-sent teen die dollar, 20-rand-71-sent teen die euro en 23-rand-91-sent teen die pond. Bitcoin verhandel teen 118-duisend-313-dollar. Die prys van goud is drie-duisend-322-dollar-53-sent per fynons en die prys van Brent-ruolie is 70-dollar-11-sent per vat.

Bly ingeskakel vir meer nuus……………….