NUUSFLITS NUUSAGENTSKAP 3 Februarie 6 nm

Goeiemiddag,

In die bulletin:

# Regter Dustin Mlambo beloof om geslagstransformasie te bevorder
# Die moratorium op brandstofverskaffingslisensies in Algoabaai gaan opgehef word
# En die Wes-Kaapse polisie behaal ‘n deurbraak teen onwettige kreefvissers

# Die regterpresident van die Gautengse Hooggeregshof, Dunstan Mlambo, sê geslags- en rassetransformasie van die land se regbank sal voorop staan as hy tot hoofregter verkies word. Hy het in sy onderhoud gesê sy rekord as hoof van Regshulp Suid-Afrika en die Gautengse regbank is bewys van sy toewyding. Mlambo sê hy glo hy het sy deel gedoen en sal voortgaan om geslagstransformasie te bevorder:

Speel klankgreep: ENG Dunstan Mlambo 1 

# Veiligheidsmaatreëls is by die bouperseel van die Hooggeregshof in Durban opgeskerp nadat gewapende mans dit bestorm het. Die groep beweer hulle verteenwoordig ‘n plaaslike ontwikkelingsforum en het werksgeleenthede geëis. Die mans het werkers verhoed om te werk en kontrakteurs weggejaag in ‘n poging om beheer oor te neem van die perseel. Thamsanqa Mchunu van die Departement Openbare Werke en Infrastruktuur het die voorval veroordeel en sê dit sal nie geduld word nie. Mchunu sê ses van die mans is in hegtenis geneem en bouwerk hervat Maandag.

# Die Suid-Afrikaanse Maritieme Veiligheidsowerheid het aangekondig die moratorium op die toekenning van lisensies vir die verskaffing van vaartuig-brandstof in Algoabaai in die Oos-Kaap, sal vanaf 1 April opgehef word. SAMSA se waarnemende hoofbestuurder, Tsepiso Taoana-Mashiloane, sê die besluit sal ander belanghebbendes toelaat om aansoek te doen vir lisensies. Sy sê slegs aanlyn aansoeke sal oorweeg word en alle belanghebbendes wat hulle aansoeke in die verlede ingedien het, moet weer deur die aanlyn stelsel aansoek doen. Die moratorium is op 22 Augustus 2019 ingestel, hangende die afhandeling van ‘n dravermoë- en risiko-bepalingstudie.

# Lede van die Wes-Kaapse blitspatrollie het ‘n deurbraak gemaak in die stryd teen onwettige kreefvangste. Polisiewoordvoerder Wesley Twigg sê lede het inligting ontvang oor ‘n onwettige vangs in Valsbaai. Hy sê ‘n verdagte wat aangekeer is, sal môre in die Strand se Landdroshof verskyn:

Speel klankgreep: ENG PoliceONCrayfishTails

# Rugby: Die stut Brok Harris sal Saterdag voor hardloop wanneer die Stormers op die veld draf in die Kaapstad-stadion. Hy speel sy 100ste wedstryd vir die gashere wanneer hulle die Haaie pak in die Verenigde Rugbykampioenskap. Harris het sy debuut in 2007 gemaak en voorheen 93 Super Rugby-wedstryde gespeel. Hy begin as vaskopstut in een van twee veranderings aan die opdrafspan. Die enigste ander verandering is Warrick Gelant wat as heelagter begin, met Damian Willemse wat hierdie week een van twee agterspelers op die bank is.

# En die finansiële aanwysers: Die rand verhandel teen 15-rand-28-sent teen die dollar, 17-rand-42-sent teen die euro en 20-rand-79-sent teen die pond. Bitcoin verhandel teen 36-duisend-599-dollar-30-sent. Die prys van goud is een duisend-792-dollar-8-sent per fynons en die prys van Brent ruolie 88-dollar-96-sent per vat.

Vir die jongste nuusgebeure, bly ingeskakel op ……………….