NUUSFLITS NUUSAGENTSKAP 5 Januarie 3 nm

Goeiemiddag,

In die bulletin:

# Die leier van die DA sê die betrokkenes in die verslag oor staatskaping moet vervolg word
# Twee verdagtes is in hegtenis geneem nadat ‘n ontvoerde skoolmeisie gevind is
# En in rugby: Die Sewes-ster Angelo Davids sluit kontrak met die Westelike Provinsie

# Die leier van die DA, John Steenhuisen, sê senior regeringsamptenare wat as hoofrolspelers in die verslag oor staatskaping uitgewys is, moet vervolg word. Steenhuisen het vandag aan eNCA gesê die suksesoomblik vir die bevindinge in die verslag sal wees wanneer die eerste skuldigbevindings plaasvind:

Speel klankgreep: ENG John Steenhuisen

# Twee verdagtes is in hegtenis geneem, maar die hoofverdagte word nog gesoek ná die ontvoering van ‘n 11-jarige meisie. Die leerder, wat in November voor haar skool in Mayfair, Johannesburg, ontvoer is, is intussen gevind. ‘n Polisiewoordvoerder, Robert Netshiunda, sê die meisie is ongedeerd gevind nadat sy op 17 November voor die Laerskool E.P. Baumann ontvoer is. Hy sê meer inligting sal later bekend gemaak word.

# Hongkong het vlugte uit agt lande verbied as deel van sy strenger nuwe virus-inperkings. Dit volg met die verspreiding van Omikron wat buite beheer is van Europa tot in Amerika. AFP berig dat vlugte uit Australië, Kanada, Frankryk, Indië, Pakistan, die Filippyne, Brittanje en Amerika vir die volgende twee weke in Hongkong verbied is. Dit is die jongste ekonomiese terugslag vir die gebied waar gevalle laag gehou is, maar waar inwoners van die buitewêreld afgesny is deur streng grensbeheer.

# Die departement van Werkverskaffing en Arbeid het vir kommentaar gevra oor die teiken wat vir vanjaar met nuwe miminumlone gestel word. AgriSA het in sy reaksie gewaarsku verdere loonsverhogings gaan lei tot meer werksverliese. Die department se mees onlangse aanpassing was in Maart verlede jaar toe die huidige loon op 21-rand-69 per uur vasgestel is. Die department moet nog die nuwe bedrag bekendmaak, maar die verwagting is dat dit nader aan 23 rand per uur sal wees. Johan Wege van AgriSA sê werkloosheid is ‘n krities-deurslaggewende faktor: 

Speel klankgreep: AFR JohanWegeOORMinimumloon

# Rugby: Die Springbok-sewesster Angelo Davids het ‘n tweejaarkontrak met die Westelike Provinsie gesluit. ‘n Woordvoerder, Michael de Vries, sê die 22-jarige het in 2020 die eerste keer vir die Stormers én die Westelike Provinsie uitgedraf en keer nou voltyds terug nadat hy in 2021 meer op Sewes-rugby gefokus het. De Vries glo die Davids-kontrak is ‘n sterk inspuiting vir die Stormers-span in die Verenigde Rugby Kampioenskap. Davids sê hy is verheug om aan die begin van ‘n opwindende nuwe hoofstuk van sy loopbaan terug te wees by sy Stormers-spanmaats.

# En ten slotte: Die finansiële aanwysers: Die rand verhandel teen 15-rand-85-sent teen die dollar, 17-rand-95-sent teen die euro en 21-rand-47-sent teen die pond. Bitcoin verhandel teen 46-duisend-181-dollar-80-sent. Die prys van goud is een duisend-819-dollar-44-sent per fynons en die prys van Brent ruolie 80-dollar-10-sent per vat.

Vir die jongste nuusgebeure, bly ingeskakel op ……………….