NUUSFLITS NUUSAGENTSKAP 13 Februarie 12 nm

Goeiemiddag,

In die bulletin:

# Onderwysamptenare in die Noord-Kaap kla oor kantore wat wemel van slange
# Die Gautengse polisie raak slaags met lede van Operasie Dudula in Hillbrow
# En, Olimpiese Spele: Amptenare soek ‘n wyer ondersoek na ‘n ysskaatser se positiewe opkikkertoets

# Amptenare van die Departement van Onderwys in die Noord-Kaap voer aan hulle werk onder gevaarlike toestande. Die Suid-Afrikaanse Demokratiese Onderwysvakbond berig die kantore is vol slange, skerpioene en spinnekoppe. Malgas Motsabi van Sadtu sê hulle het die kwessie verskeie kere al met die departement bespreek, maar hulle pleidooie vir ‘n veilige werksomgewing het op dooie ore geval:

Speel klankgreep: ENG EducationReptiles

# Lede van Operasie Dudula het beloof hulle gaan volgende naweek na Hillbrow in Johannesburg terugkeer en voortgaan om buitelanders sonder dokumente te konfronteer. Die polisie het gister rubberkoeëls, traangas en waterkanonne gebruik om die skare uiteen te jaag want hulle opmars was nie gemagtig nie. ‘n Woordvoerder van Operasie Dudula, Nhlanhla Lux Dlamini, sê hulle beplan om met gekaapte geboue, dwelmbase en buitelandse informale handelaars af te reken, en niks gaan hulle afskrik nie. Dlamini voeg by hulle volgende veldtog gaan die relevante toestemming van wetstoepassera hê:

Speel klankgreep: ENG NhlanhlaLux

# ‘n Spookdorp het sy verskyning op die grens tussen Spanje en Portgual gemaak na ‘n droogte ‘n dam byna leeggemaak het. Die dorpie Aceredo is in 1992 oorstroom om die Alto Lindoso-opgaardam te skep. Die plaaslike burgemeester sê ‘n Portugese energiemaatskappy het die waterverbruik wanbestuur. Met die opgaardam op 15-persent van sy kapasiteit, het die besonderhede van die lewe in 1992 te voorskyn gekom. Besoekers het half-ineengestorte dakke, kratte met leë bierbottels in wat voorheen ‘n kafee was, en ‘n geroeste ou motor daar aangetref.

# Olimpiese Spele: Amptenare sê hulle sal ‘n teen-opkikker-ondersoek na Russiese dokters, afrigters en die  familie van die ysskaatser Kamila Valieva verwelkom. Die 15-jarige het in trane uitgebars na ‘n emsionele oefensessie wat gehou is terwyl haar saak aangehoor word. Die tiener se toekoms by die Olimpiese Spele lyk onseker ná sy positief vir ‘n verbode middel getoets het. Valieva het vroeër ‘n goue medalje in ‘n spanbyeenkoms in Beijing gewen en sy is veronderstel om  Dinsdag aan die vrouekompetisie deel te neem.

# En, ten slotte: ‘n Biografie van die stigter van die Suid-Afrikaanse Raad vir Blindes, Mike Bowen, is bekendgestel. Die boek, met die titel Blindness and the power of Inner Vision, is deur Hilary Marlow geskryf en is in boekvorm en in braille beskikbaar. Xolisa Yekani van die raad sê Bowen, wat self blind is, het ‘n onmisbare rol gespeel in die totstandkoming van die liggaam.

Vir die jongste nuusgebeure, bly ingeskakel op ……………….