Nuus 09:00
BULLETIN 26 November 9 vm
Goeiemôre. Ek is……..
In die bulletin:
# Die polisie waarsku ouers teen aanlyn seksuele teisteraars
# Minister Chikunga stel die feestyd se Arrive Alive-padveiligheidsveldtog in Gauteng bekend
# En, gholf: Thriston Lawrence het ‘n tweede Joburg Ope in die oog
# Die polisie waarsku ouers oor aanlyn seksuele teistering terwyl die land hom voorberei vir die 16 dae van aktivisme vir geen geweld teen vroue en kinders. Ouers word aangemoedig om hulle kinders se toestelle soos tabletrekenaars en selfone daagliks te monitor. Hulle moet ouerbeheer-sagteware installeer wat skadelike inhoud kan blok. ‘n Polisiewoordvoerder Athlenda Mathe, sê die predatore lok kinders met aanlynrekenaarspeletjies en ouers moet ekstra wakker wees:
# Die minister van Vervoer, Sindiswe Chikunga, stel vandag amptelik die 2023/2024-padveiligheidsveltog vir die feestyd by die Tsakane-stadion in Ekurhuleni, Gauteng, bekend. Dit is vandag die Wêrelddag vir die Herdenking van Padverkeerslagoffers om erkenning te gee aan slagoffers van padverkeersongelukke en hulle families, soos die Verenigde Nasies se Algemene Vergadering dit in 2005 aanvaar het. Die woordvoerder van die Paverkeersbestuurskorporasie, Simon Zwane, sê die fokus van vanjaar se veldtog is die impak van alkohol op die gedrag van padgebruikers en die bydrae wat dit maak tot die slagting op paaie:
# ‘n Geraamde 100-duisend mense het gister in Tel Aviv, Israel, betoog vir die vrylating van alle mense wat Hamas gevange hou. Dit het op die die tweede dag van ‘n tydelike skietstaking tussen die Palestynse groep en Israel gebeur. Die betogers het byeengekom op wat die Israeli’s ‘Hostage Square’ noem. Die geleentheid herdenk ook die 50 dae sedert Hamas se 7 Oktober-aanval in die suide van Israel waarin sowat een-duisend-200 mense dood is.
Sentraal-Londen was ook gepak met tienduisende mense wat ‘n permanente skietstaking in Gaza eis. Hulle sê die tydelike verposing bring min verligting ná ‘n beraamde 15-duisend Palestyne in Israeliese aanvalle omgekom het.
# Gholf: Thriston Lawrence is die voorloper met ‘n voorsprong van drie houe in vandag se finale ronde van die Joburg Ope by die Houghton Gholfklub. Lawrence het ‘n derde ronde van 67 aangeteken met ‘n algehele totaal van 15 onder baansyfer. Hy het sy visier op ‘n tweede Joburg Ope-titel na hy dit in 2021 ingepalm het. Sy naaste teenstander is Dean Burmester met 12 onder, na hy 68 aangeteken het, terwyl Jacques Kruyswijk en Nkhil Rama goed geplaas is met 11 onder, na hulle onderskeie rondes van 69 en 72.
# En ten slotte: Die direkteur-generaal van die Wêreldgesondheidsorganisasie Tedros Ghebreyesus sê klimaatsverandering skaad reeds mense se gesondheid en welstand. Siektes neem toe wat veroorsaak word deur ekstreme klimaatsgebeurlikhede, plus dié wat deur draers oorgedra word, asook die styging in kardiovaskulêre en asemhalingsiektes, wat onderskeidelik veroorsaak word deur uiterste hitte en lugbesoedeling. Dus kan die uitwerking van die klimaat op menslike gesondheid nie ontsnap word nie. Ghebreyesus sê net ‘n klimaatsbeleid wat aangedryf word deur gesondheidsoorwegings sal uitloop op die optrede wat nodig is om lewens te red, siektes te voorkom en gesonder, regverdiger gemeenskappe te bou.
Bly ingeskakel vir meer nuus……………….