NUUSFLITS NUUSAGENTSKAP 14 November 9 vm

Goeiemôre,

In die bulletin:

# ‘n Uitgebreide soektog is aan die gang ná ‘n swemmer aan die Suid-Kaapse kus vermis raak
# Shaun Pollock in sy noppies om as een van wêreld se beste krieketspelers erken te word
# En, die gewilde skrywer Wilbur Smith sterf in die ouderdom van 88

# Die polisie, reddings- en nooddienste soek na ‘n man vermis geraak toe by Heroldsbaai naby George in die Suid-Kaap geswem het. Die man van Gqberha in die Oos-Kaap is in sy twintigs. Die woordvoerder van die Nasionale Seereddingsinstituut, Craig Labinon, sê verskeie NSRI-vrywilligers, plaaslike branderplankryers en ‘n helikopter het tot laat gistermiddag na die man gesoek. Die polisie ondersoek die voorval. Die NSRI se Wildernis-tak en die George Brandweer- en Reddingsdiens help die polisie se duikeenheid in hulle soektog wat vandag voortduur.

In die Demokratiese Republiek van die Kongo duur die soektog voort na 20 mense wat vermis geraak het na hulle gemotoriseerde kano op die Kivu-meer in twee gebreek het. Agt mense het in verlede week se tragedie verdrink. Sestig mense is gered. ‘n Ooggetuie het aan AFP gesê die ou passasierskano was oorlaai. ‘n Skip wat in 2019 in die meer op die grens tussen die DRK en Rwanda vergaan het, het die lewe van 100 mense geëis.

# Terug op die tuisfront: President Cyril Ramaphosa gaan die hoofspreker wees by die openingsessie van die 2021-Inter-Afrika-handelskou in KwaZulu-Natal. Die geleentheid word by die Inkosi Albert Luthuli-internasionale konferensiesentrum in eThekwini gehou. ‘n Woordvoerder van die departement van Handel en Nywerheid, Bongani Lukhela, sê die byeenkoms sal na verwagting meer as tienduisend besoekers en kopers lok:

Speel klankgreep: ENGBonganiLukhela

# Krieket: Die voormalige kaptein van die Proteas, Shaun Pollock, is in die gesogte Hall of Fame van die Internasionale Krieketraad opgeneem. Die legendariese speler van Sri Lanka, Mahela Jayawardene en die voormalige Engelse vroue-kolwer, Janette Brittin, is saam met Pollock vereer. Die veelsydige Pollock is die eerste speler wat drie-duisend-lopies en 300 dubbelpaaltjies in toets- én een-dag-krieket kon behaal. Hy sê die eer is die kersie op die koek van sy loopbaan.

# En laastens, die internasionaal-erkende skrywer Wilbur Smith is by sy huis in Kaapstad in die ouderdom van 88 oorlede. Sy uitgewer het Smith se dood as onverwags beskryf en sê sy vrou Niso was by hom. Met 49 boeke sedert sy eerste roman in 1964, When the Lions Feeds, het Smith ‘n huishoudelike naam in die skryf van spanningsromans geword. Meer as 140-miljoen eksemplare van sy boeke is wêreldwyd in meer as 30 tale verkoop. In talle van sy romans figureer die Courtney-familie en hulle wedervaringe word oor drie eeue oor die wêreld heen uitgebeeld. Dit het die langslopende reeks in uitgewersgeskiedenis geword.

Vir die jongste nuusgebeure, bly ingeskakel op ……………….