Nuus 08:00
BULLETIN 25 November 8 vm
Goeiemôre. Ek is……..
In die bulletin:
# Eskom werk aan ingrypings om beurtkragfases te verlaag
# Die ANC word beveel om ‘n KZN-maatskappy R102-miljoen plus rente te betaal
# En, gholf: Rama is op pad om geskiedenis te maak by die Joburg Ope
# Eskom werk aktief aan ingrypings om beurtkragfases te verlaag. Dit volg nadat beurtkrag vanaf fase 4 na fase 6 verhoog is vir die naweek. Die minister van Elektrisiteit, Kgosientsho Ramokgopa, het sleutelmaatreëls uiteengesit, insluitend die dringende verbintenis om die terugkeer van opwekkings-eenhede en die aanvulling van noodreserwes te verseker. Hy het op ‘n nuuskonferensie gesê hierdie ingrypings is van kardinale belang vir die bestendigheid en beskerming van die netwerk:
Eskom se hoof van Opwekking, Bheki Nxumalo, sê intussen die groot vraag na elektrisiteit het bygedra tot die verhoogde beurtkrag na fase 6 tot Maandagoggend vyfuur. Nxumalo herhaal wat die minister van Elektrisiteit, Kgosientsho Ramokgopa, gesê het – die verhoogde beurtkrag kan ook toegeskryf word aan sommige opwekkings-eenhede wat tans buite werking is en die noodsaaklikheid om belangrike hulpbronne aan te vul:
# Die ANC moet ‘n handelsmerkmaatskappy van KwaZulu-Natal meer as 100-miljoen-rand betaal nadat die regerende party ‘n aansoek in die Appèlhof verloor het. Die geld is aan Ezulweni Investments verskuldig vir veldtogmateriaal vir die algemene verkiesing van 2019. Die ANC wou bewys daar was nie ‘n kontraktuele ooreenkoms met die maatskappy nie nadat die Hooggeregshof in Johannesburg in Mei beslis het die party is aanspreeklik vir die bedrag van 102-miljoen-rand plus rente van 10,25-persent vanaf Mei 2019 tot Augustus die volgende jaar. Die Appèlhof het die aansoek met koste van die hand gewys.
# Nege-en-dertig Palestyne en 13 Israeli’s is tuis verwelkom na hulle onderskeidelik uit Israeliese tronke en gevangenisskap in Gaza vrygelaat is. Tien burgers van Thailand en een Fillipyn is ook gister uit Gaza vrygelaat en is nou in Israel. Die Israeliese groep sluit jong kinders en bejaarde vroue in. Die kantoor van die Israeliese eerste minister het op die eerste dag van die gespanne tydelike skietstaking in die Israeliese-Gaza-konflik gesê hulle het die lys van die aangehoudendes ontvang wat vandag vrygelaat sal word. Die vrygelate Palestyne is die eerste van 150, hoofsaaklik ma’s en tienerseuns, wat Dinsdag vrygelaat gaan word.
# En, om mee af te sluit, gholf: Nikhil Rama is dié naweek met een hou die voorloper by die Joburg Ope. Die 22-jarige Suid-Afrikaner het gister die beste ronde van sy beroepsloopbaan ooit behaal met ‘n ronde van 62. Hy lei nou die Sonskyntoer en die DP World Tour met 13 onder baansyfer. Sy naaste teenstander is die voormalige kampioen Thriston Lawrence met een hou na hy ‘n telling van 66 behaal het. Dean Burmester, met ‘n telling van 62 , sluit hom aan by Jacques Kruyswijk wat 64 aangeteken het, drie houe agter die voorloper.