Follow Us
News 08:00
Fri 4th Feb 2022
Kanada se eerste minister ontplooi nie die weermag om protesoptrede teen verpligte inentings te beëindig nie [KLANK]
Fri 4th Feb 2022
Print Friendly, PDF & Email

NUUSFLITS NUUSAGENTSKAP 4 Februarie 8 vm

Goeiemôre,

In die bulletin:

# Nestlé Suid-Afrika ondersoek Kit Kat-sjokolade nadat dit weens moontlike glasstukke onttrek is
# Denosa veroordeel die aflegging van 749 nuwe verpleegkundiges in Gauteng
# En, Amerika sê Rusland beplan ‘n skyn-insident om die Oekraïne binne te val

# Nestlé Suid-Afrika het ‘n ondersoek gelas nadat die maatskappy sommige van sy Kit Kat-sjokoladeprodukte van die rakke gehaal het omdat dit moontlik glasstukkies bevat. Die maatskappy sê slegs produkte met sekere vervaardigingskodes en die gebruik-voor-datums 30 September 2022 en 31 Oktober 2022 word geraak. Verbruikers word gewaarsku om nie hierdie produkte te eet nie. Nestlé Suid-Afrika sê hulle het glasstukkies ontdek tydens gehalte- en veiligheidstoetse. Bekommerde verbruikers kan bel of ‘n WhatsApp stuur na 086 009 6116, of ‘n e-pos aan consumer.services@za.nestle.com.

# Suid-Afrika het in die jongste 24-uur-tydperk drie-duisend-266 nuwe Covid-19-gevalle aangeteken. Gauteng met 31-persent het die meeste gevalle, gevolg deur die Wes-Kaap met 17-persent, en KwaZulu-Natal en Limpopo met 12-persent elk. Daar is in dié tydperk 127 pasiënte in die hospitaal opgeneem. Nog 12 mense is aan Covid-19-verwante oorsake dood wat die opgeloopte syfer op 95-duisend-545 te staan bring. Die land se herstelkoers bly bestendig op meer as 95-persent.

# Die verpleegvakbond Denosa sê hy veroordeel ten sterkste die Gautengse Gesondheidsdepartement se aflegging van 749 verpleegkundiges wat onlangs gekwalifiseer het. Hulle het pas hulle gemeenskapsdiens in die provinsie voltooi. Denosa se woordvoerder, Simphiwe Gada, sê hulle is hoogs ontstoke oor die voorgenome afleggings, veral nadat hulle met die departement vergader het toe die verpleegkundiges op 31 Desember verlede jaar op onmenslike wyse deur middel van verbale en WhatsApp-boodskappe ontslaan is:

Speel klankgreep: ENGSimphiweGada

# Die Amerikaanse regering sê hy beskik oor inligting van intelligensiebronne dat Rusland ‘n skyn-voorval in die Oekraïne beplan as verskoning om die land binne te val. Blykbaar gaan ‘n vals video versprei word met beelde van burgerlike ongevalle in Donbas in die ooste van die land, met akteurs wat die rolle speel van mense wat rou oor slagoffers wat kamma in ‘n voorval dood is. Rusland sê hy beplan geen sodanige operasies nie. Die Pentagon se woordvoerder, John Kirby, sê hy glo die Kremlin ondersteun die plan:

Speel klankgreep: ENG KirbyOnRussia

# Sokker: Senegal en Egipte pak mekaar Sondag in die Afrikanasiesbeker se eindstryd nadat Egipte die gasheerland, Kameroen, met 3-1 in strafskoppe verslaan het. Nie een van die spanne kon in 120 minute van aksie ‘n doel aanteken nie. Die doelwagter Mohamed Abou Gabaski het twee strafskoppe afgeweer voor Clinton N’Jie die vierde een gemis het om die gasheerland te laat verloor. Die twee Liverpool-spelers Mohamed Salah en Sadio Mane gaan teen mekaar speel in die eindstryd. Kameroen en Burkina Faso sal môre sake uitspook vir die derde plek.

# En die finansiële aanwysers: Die rand verhandel teen 15-rand-23-sent teen die dollar, 17-rand-46-sent teen die euro en 20-rand-73-sent teen die pond. Bitcoin verhandel teen 37-duisend-341-dollar-1-sent. Die prys van goud is een duisend-806-dollar-45-sent per fynons en die prys van Brent ruolie 91-dollar-48-sent per vat.

Vir die jongste nuusgebeure, bly ingeskakel op ……………….

Our team is here to answer your questions. Editorial questions? Chat to the Editor on duty Free Trial or general questions? Chat to Debbie Technical issues? Chat to our Tekkie
WeCreativez WhatsApp Support
Free Trial / General Enquiries
Debbie Oosthuizen: GM
Away
WeCreativez WhatsApp Support
Editor on duty
Peet Bothma
Away
WeCreativez WhatsApp Support
Editor on duty
Andries Cornelissen
Away
WeCreativez WhatsApp Support
Editor on duty
Lusanda Bill
Away
WeCreativez WhatsApp Support
Technical Support
Tekkie
Away
WeCreativez WhatsApp Support
Editor on duty
Mariana Vos
Away