Follow Us
News 07:00
Sat 20th Nov 2021
Polisie-vakbondsê misdaadstatistieke is uiters kommerwekkend [KLANK]
Sat 20th Nov 2021
Print Friendly, PDF & Email

NUUSFLITS NUUSAGENTSKAP 20 November 7 vm

Goeiemôre,

In die bulletin:

# Die DearSA-veldtog doen ‘n meningspeiling oor die regering se besluit om steun aan Mej SA te onttrek
# AfriForum oorweeg ‘n privaat vervolging van die Brendin Horner-moordbeskuldigde
# En, die LUR vir Gemeenskapsveiligheid in die Wes-Kaap verwelkom die afname in die moordsyfer

# Dear South Africa het ‘n deelname-veldtog van stapel gestuur na aanleiding van wat hy noem die Departement Sport, Kuns en Kultuur se politieke inmenging. Dit volg nadat die regering sy steun onttrek het aan Mej Suid-Afrika, Lalela Mswane, om die land by die Mej Heelal-kompetisie in Israel te verteenwoordig. DearSA se direkteur Gideon Joubert sê tot op hede het hulle meer as nege-duisend unieke insetsels van die publiek ontvang:

Speel klankgreep: ENG DearSA

# Die burgerregte-organisasie AfriForum sê verwikkelinge in die Brendin Horner-moordsaak is uiters kommerwekkend. Die mans wat beskuldig is van die moord op die jong Vrystaatse plaasbestuurder, is gister tydens ‘n sitting van die Hooggeregshof in Bethlehem, vrygespreek. Die staat het vroeër toegegee daar is nie genoeg bewyse om Sekola Matlaletsa en Sekwetje Mahlamba skuldig te bevind op aanklagte van moord en roof nie.  AfriForum se woordvoerder, Jacques Broodryk, sê dit is skokkend dat die polisie ‘n jaar geneem het om te besef die DNS wat op die toneel gevind is, stem nie ooreen met dié van die beskuldigdes nie:

Speel klankgreep: ENG Broodryk

# Die Wes-Kaapse LUR vir Gemeenskapsveiligheid, Albert Fritz, verwelkom die nuus van ‘n afname in die provinsie se moordsyfer. Die minister van Polisie, Bheki Cele, het gister die misdaadstatistieke van die tweede kwartaal bekend gemaak. Fritz se woordvoerder, Wade Seale, sê 131 bendeverwante moorde is aangeteken teenoor 187 in die vorige kwartaal:

Speel klankgreep: ENG Fritz

# Australië se weermag het ‘n aktiewe strafregtelike ondersoek onthul na ‘n voorval in Afghanistan nege jaar gelede waarby ‘n Australiese kommando-peleton betrek word. Die ondersoek hou verband met die beweerde moord van ‘n Afghaanse gevangene deur Australiese soldate, omdat daar nie vir hom plek was op ‘n Amerikaanse helikopter nie. ABC News het ‘n jaar gelede berig oor die bewerings wat ‘n Amerikaanse seesoldaat gemaak het. Die peleton se gewese bevelvoerder, Heston Russell, het dit ontken. Die department wil nie klankopnames oor die voorval vrystel nie, want dit kan die ondersoek belemmer.

# En ten slotte motorsport:  Formule Een amptenare het ‘n versoek deur Mercedes van die hand gewys om die besluit te hersien dat die Red Bull renjaer Max Verstappen nie gestraf moet word nie. Dit hou verband met ‘n voorval waarby hy en Lewis Hamilton tydens die Sao Paulo Grand Prix betrokke was. Verstappen loop tans voor in die stryd om die Formule Een renjaerstitel vir die jaar. In ‘n verklaring voor die Katar Grand Prix hierdie naweek, sê die baanbeamptes hoewel Mercedes nuwe en tersaaklike video-materiaal voorgelê het, maak dit nie ‘n verskil nie, aangesien dit bloot die insident vanuit ‘n ander kamerahoek wys. Die sewemalige wêreldkampioen Hamilton het verlede Saterdag die wedren in Brasilië gewen en daarmee Verstappen se voorsprong op die punteleer tot 14 verminder. Daar is nog drie wedrenne vir die seisoen oor.

Vir die jongste nuusgebeure, bly ingeskakel op ……………….

Our team is here to answer your questions. Editorial questions? Chat to the Editor on duty Free Trial or general questions? Chat to Debbie Technical issues? Chat to our Tekkie
WeCreativez WhatsApp Support
Free Trial / General Enquiries
Debbie Oosthuizen: GM
Away
WeCreativez WhatsApp Support
Editor on duty
Peet Bothma
Away
WeCreativez WhatsApp Support
Editor on duty
Andries Cornelissen
Away
WeCreativez WhatsApp Support
Editor on duty
Lusanda Bill
Away
WeCreativez WhatsApp Support
Technical Support
Tekkie
Away
WeCreativez WhatsApp Support
Editor on duty
Mariana Vos
Away