NUUSFLITS NUUSAGENTSKAP 14 Februarie 6 vm

Goeiemôre,

In die bulletin:

# ‘n Onafhanklike spesialis-ingenieurspan is aangestel om die brandskade in die Parlement te bepaal
# AfriForum is sterk gekant teen die Wysigingswetsontwerp op Basiese Onderwys
# En, nege senior amptenare in Gauteng is geskors ná ‘n verslag deur die Spesiale Ondersoekeenheid

# Die Departement van Openbare Werke en Infrastruktuur het ‘n onafhanklike spesialis-ingenieurspan aangestel om die skade te bepaal wat verlede maand deur ‘n brand aan die parlementêre geboue aangerig is. Zandile Mafe word daarvan beskuldig dat hy na bewering die parlement aan die brand gesteek het. Minister Patricia de Lille sê die span sal verdere omvattende skadebepaling en toetse doen, na aanleiding van ‘n voorlopige visuele oorsig wat bevind het daar is ernstige strukturele skade aan die nuwe Nasionale Vergadering-gebou. Sy sê sy is gretig om die span se volledige skadebepaling, en rehabilitasie- en herstelkoste te ontvang.

# AfriForum sê dis kommerwekkend dat die Wysigingswetsontwerp op Basiese Onderwys, wat al meer as vyf jaar hangende is, nou weer ter tafel gelê word. Die wetsontwerp stel ’n aantal veranderings voor aan die regulasies in skole, insluitend leerderbywoning en voorwaardes waaronder alkohol op skoolpersele verkoop mag word. Dit is verlede week aan die Parlement se portefeuljekomitee oor Basiese Onderwys voorgelê. Alana Bailey van AfriForum sê in die verlede was daar oorweldigende teenkanting teen die wetsontwerp:

Speel klankgreep: AFR BaileyOnBill

# Die Gautengse provinsiale regering het nege senior amptenare as ‘n voorsorgmaatreël geskors, nadat hulle in ‘n verslag deur die Spesiale Ondersoekeenheid geïmpliseer is. Die amptenare is drie senior bestuurders in die Departement van Gesondheid en ses senior bestuurders in die Departement van Infrastruktuurontwikkeling. Die SOE-verslag het ernstige onreëlmatighede ontbloot, in die toekenning van tenders vir die opknapping van die Anglo Gold Ashanti-hospitaal aan die Wes-Rand. Die provinsiale regering se woordvoerder, Vuyo Mhaga, sê dissiplinêre verhore sal begin sodra die aanklagte afgehandel is:

Speel klankgreep: ENG MhagaOnOfficials

# Die Gautengse LUR vir Onderwys, Panyaza Lesufi, besoek vandag die Hoërskool Jan Viljoen in Randfontein, na ‘n gewelddadige voorval tussen leerders by die skool. Die gewelddadige onderonsie het na bewering verlede week tussen swart en wit leerders by die skool uitgebreek, met sommige wat meen dit was rasgemotiveerd. Die LUR sal tydens ‘n feitesending die leierskap van die skool en leerders ontmoet om die oorsaak van die geweld vas te stel. Lesufi sê daar sal dissiplinêr teen die oortreders opgetree word.

# Franse magte het tientalle vegters in Burkina Faso doodgeskiet. Die aanval word verbind  met die dodelike aanval verlede week in die naburige Benin, waar een van die slagoffers ‘n Franse burgerlike was. ‘n Franse weermag-generaal het die dodetal in Burkina Faso op 40 gestel. Die Franse burger was onder nege mense wat dood is, in twee aanvalle op wildbewaarders in die W-Nasionale Park, ‘n wildtuin in die afgeleë noordelike deel van Benin. Al Jazeera berig twee myne op paaie het ook vyf wildbewaarders, een park-amptenaar en ‘n soldaat gedood.

# Rugby: Die Blitsbokke se indrukwekkende afrigter Neil Powell is op pad Durban toe. Die Haaie het hom oorgehaal om hulle nuwe direkteur van rugby te wees. Sy aanstelling tree in September in werking, nadat die Sewes-wêreldbeker afgehandel is. Die Haaie se hoofbestuurder Ed Coetzee sê  Powell se sterk werksetiek en aandrang op toerekeningsvatbaarheid en respek, sal hulle help om optimaal te presteer in beide die Verenigde Rugbykampioenskap en die Curriebeker. Sean Everitt bly die hoofafrigter van die Haaie se senior span.

# En die finansiële aanwysers: Die rand verhandel teen 15-rand-22-sent teen die dollar, 17-rand-30-sent teen die euro en 20-rand-65-sent teen die pond. Bitcoin verhandel teen 42-duisend-98-dollar-7-sent. Die prys van goud is een duisend-858-dollar-38-sent per fynons en die prys van Brent ruolie 95-dollar-70-sent per vat.

Vir die jongste nuusgebeure, bly ingeskakel op ……………….