Sportnuus 12:30

BULLETIN SPORTNUUS 21 November 12:30 nm

Goeiemiddag. Ons kyk na die jongste sportnuus en uitslae:

# Krieket is vandag eerste aan die beurt: Die eindstryd van die tweede seisoen van die SA20 word op die tiende Februarie op Nuweland in Kaapstad gespeel. Sunrisers Eastern Cape begin die verdediging van sy titel ʼn maand vroeër op St Georgepark in Gqeberha teen Joburg Super Kings. Altesaam 33 wedstryde word gespeel. Die eerste kwalifiseerder word ook op Nuweland gespeel en twee agtereenvolgende uitklopwedstryde word op die Wanderers in Johannesburg aangebied – die uitklop en die tweede kwalifiseerder.

Quinton de Kock is intussen die enigste Suid-Afrikaner in die Wêreldbeker-elftal wat die Internasionale Krieketraad na afloop van die toernooi aangewys het. Hy het 594 lopies bygedra, insluitend vier honderdtalle. Die Protea-snelbouler Gerald Coetzee is as twaalfde man aangewys. Daar is ses spelers van die gasheer, Indië, wat in die eindstryd teen Australië verloor het: Rohit Sharma, Virat Kohli, KL Rahul, Ravindra Jadeja, Jasprit Bumrah en Mohammed Shami. Die ander is Adam Zampa en Glenn Maxwell van Australië, Daryl Mitchell van Nieu-Seeland en Dilshan Madushanka van Sri Lanka.

# Gholf is volgende: Die dubbele PGA-toernooi-kampioen, Erik van Rooyen, en die Major-wenners Louis Oosthuizen en Charl Schwartzel lei ʼn sterk groep vir volgende maand se Alfred Dunhill-kampioenskap. Die wenners van agt van die afgelope nege toernooie, insluitend Schwartzel met ʼn rekord van vier oorwinnings, sal deelneem. Ockie Strydom sal probeer om slegs die derde speler in die Alfred Dunhill-kampioenskap se geskiedenis te word om sy titel suksesvol te verdedig. Die toernooi vind volgende maand van die sewende tot die tiende by die Leopard Creek-buiteklub in Mpumalanga plaas.

# Dis nou tyd vir rugby: Die voorsitter van die Walliese Rugbyunie, Richard Collier-Keywood, het beloof die beheerliggaam sal volgende jaar ʼn omvattende strategie instel. Dit volg nadat ʼn onafhanklike ondersoek bevind het sekere aspekte van die unie se kultuur is seksisties, rassisties, homofobies, haat vroue en word nie behoorlik hanteer nie. Die verslag het ook bevind daar is elemente van afknouery en diskriminasie in die unie. Collier-Keywood het aan die BBC gesê hulle moet openlik wees oor wat voortaan aanvaarbaar is in die organisasie:

# Om mee af te sluit: Die ambassadeur van die Suid-Afrikaanse beenmurg-register, Christine Roos, het die uitmergelende 33 kilometer oor Valsbaai afgelê wat ook die Everest van Kaapse swemgeleenthede genoem word. Sy het gister die ysige water tussen Millers Point en Rooi Els aangedurf en deur geniepsige jellievisse, uitputting en pyn geworstel om die swemtog te voltooi. Roos het dit gedoen om minstens 50-duisend-rand in te samel vir die register se pasiënte-hulpprogram. Sy sê dit was niks in vergelyking met pasiënte en hulle gesinne se stryd om ʼn geskikte skenker te kry sodat ʼn lewensbedreigende bloedsiekte behandel kan word nie.

Bly ingeskakel vir meer nuus……………….