Sportnuus 12:30

BULLETIN SPORTNUUS 7 Oktober 12:30 nm

Goeiemiddag, ons kyk na die jongste sportnuus en uitslae:

# Ons begin met Olimpiese Spele: Suid-Afrika is een van sewe lande wat belangstelling getoon het om die Olimpiese Somerspele van 2036 aan te bied. Die ander lande is Indië, Katar, Duitsland, Hongarye, Turkye en Suid-Korea. Die Internasionale Olimpiese Komitee sê lande het tot die einde van dié maand om hul belangstelling bekend te maak voordat ‘n kortlys in Maart volgende jaar opgestel word. Die Spele van 2028 vind in Los Angeles plaas, terwyl Brisbane die Spele van 2032 sal aanbied. Suid-Afrika het nog nooit die Spele aangebied nie.

# Krieket: Die Proteas se top-snelbouler, Kagiso Rabada, sal al die tyd kry wat nodig is om sy fiksheid te bewys vir die eerste toets teen Australië wat Vrydag in Durban begin. ‘n Besering het hom uit die eendagreeks tussen die twee lande gehou, maar hy het ‘n tweedaagse wedstryd tussen spanlede sonder probleme voltooi. Hulp-afrigter Ashwell Prince sê die 31-jarige het goed geboul en sal voortgaan om aan oefeninge deel te neem. Die tweede toets begin die 18de in Gqeberha en die laaste een die 27ste in Kaapstad.

# Sokker: Lionel Messi het sy skitterende internasionale loopbaan met ‘n doel afgesluit in sy 208ste en laaste wedstryd vir Argentinië – die 39-jarige se 126ste doel. Die Argentyne het die vriendskaplike kragmeting met Benin in Buenos Aires 3-0 gewen. Messi het die volgepakte stadion van 85-duisend mense na die wedstryd toegespreek en gesê dit was wonderlik om vir Argentinië te speel en sy drome te verwesenlik. Die agtmalige wenner van die Ballon d’Or sal sy loopbaan op klubvlak by Inter Miami voortsit, waar sy kontrak in 2028 verstryk.

Cristiano Ronaldo beskuldig Portugal se hoofafrigter, Jorge Jesus, intussen dat hy sy beloftes aan hom verbreek het. Die 41-jarige kaptein het die nasionale span op die vooraand van ‘n Nasiesliga-wedstryd teen Denemarke verlaat nadat hy ʼn ongebruikte plaasvervanger teen Noorweë was. Renaldo beskuldig Jesus in ʼn lang verklaring van ʼn absolute skending van vertroue omdat hy hom nie soos hy beloof het teen Noorweë laat speel het nie, en nie die ooreengekome weergawe van gebeure aan die media voorgelê het nie. Hy beklemtoon dat hy nie aan die nasionale span onttrek nie.

# En rugby: Argentinië, Uruguay, Chili en Brasilië hoop om die Wêreldbekertoernooi in 2035 die eerste keer ooit na Suid-Amerika te neem. Hulle het ‘n gesamentlike bod ingedien en beplan om elf stadions in tien stede te gebruik – agt in Argentinië en een in elk van die ander drie lande. Spanje en Japan het ook belangstelling getoon om die toernooi aan te bied. Wêreldrugby sal in Mei volgende jaar die voorkeur-gasheer aanwys na terreinbesoeke en uitvoerbaarheidstudies, en die amptelike aankondiging sal in November gedoen word.

Bly ingeskakel vir meer nuus……………….