Sportnuus 12:30

BULLETIN SPORTNUUS 22 Januarie 12:30 nm

Goeiemiddag. Ons kyk na die jongste sportnuus en uitslae:

# Ons begin vandag met gemengde gevegskuns: Suid-Afrika se eerste Ultimate Fighting Championship-kampioen, Dricus du Plessis, sê hy sluit nie die moontlikheid uit van ‘n titelgeveg teen Israel Adesanya van Nieu-Seeland op die komende 300-jarige feesvieringe van die UFC nie. Hy het die verdedigende kampioen, die Amerikaner Sean Strickland, gister in ‘n venynige vyfronde-geveg in Toronto, Kanada, verslaan om die UFC-middelgewigtitel te wen. Du Plessis sê dit is niks persoonlik om teen Adesanya te wil veg nie:

Die president van UFC, Dana White, het intussen laat blyk ‘n Afrika-toernooi kan moontlik in Suid-Afrika plaasvind na Du Plessis se geskiedkundige oorwinning om hom die eerste Suid-Afrikaanse UFC-kampioen te maak. Volgens White vorder planne vir so ŉ toernooi, met Suid-Afrika, Nigerië en Rwanda moontlike plekke. Baie ondersteuners stel Kaapstad-stadion voor, weens die stad se infrastruktuur en rekord vir die aanbied van wêreldklas-geleenthede. Die stap is daarop gemik om UFC se teenwoordigheid op die vasteland te vestig.

# Vervolgens, sokker: Bafana Bafana het Namibië met vier-nul verslaan en hulle hoop lewend gehou om die laaste 16 van die Afrikabekertoernooi in Ivoorkus te haal. Twee doele deur Themba Zwane, Percy Tau se verdoelde strafskop en ‘n doel deur Thapelo Maseko laat in die wedstryd het Suid-Afrika die tweede plek in Groep E besorg, een punt agter die voorloper, Mali. Bafana Bafana moet Tunisië Woensdag wen om die uitkloprondes te haal. Afrigter Hugo Broos sê sy span se selfvertroue het ŉ hupstoot gekry nadat hulle hul eerste punte in die kompetisie verdien het:

# Ons kyk vervolgens na krieket: Die Paarl Royals het op Bolandpark hul heel eerste sege in ŉ Kaapse derby oor M-I Cape Town behaal. Hulle spog ook met ŉ 59-lopie-bonuspunt om hulle posisie boaan die SA20-ranglys te verseker. ŉ Aanvangsvennootskap van 116 lopies tussen Jason Roy en Jos Buttler het die grondslag gelê vir die Royals se totaal van 162 vir drie. M-I Cape Town is daarna vir net 103 uitgeboul in hulle derde nederlaag in die kompetisie. Die Royals se draaibouler, Tabraiz Shamsi, sê hulle het ekstra motivering gehad om te wen:

# Ons sluit af met tennis: Die kwalifiseerder Dayana Yastremska van Oekraïne is deur na die eerste Grand Slam-kwarteindronde van haar loopbaan nadat sy die tweemalige kampioen, Victoria Azarenka van Belarus op die Australiese Ope verslaan het. Die 23-jarige Yastremska het die wêreld se voormalige nommer een met 7-6 en 6-4 geklop. Die Tsjeggiese tiener Linda Noskova is ook deur na haar eerste major-kwarteindronde nadat Elina Svitolina van Oekraïne weens ŉ rugbesering aan haar wedstryd in die ronde van 16 moes onttrek. Yastremska sê sy moes alles uithaal om Azarenka te wen:

Bly ingeskakel vir meer nuus……………….