Sportnuus 12:30

BULLETIN SPORTNUUS 27 Augustus 12:30 nm

Goeiemiddag, ons kyk na die jongste sportnuus en uitslae:

# Ons begin met rugby: Die Springbok-vroue se hulpafrigter, Franzel September, sê hulle het goeie momentum in aanloop tot Sondag se tweede Wêreldbekerwedstryd teen Italië in Engeland. Suid-Afrika het Brasilië oortuigend met 66-6 geklop in hulle openingswedstryd en ‘n oorwinning oor Italië sal hulle onder die top-twee in Groep D plaas en ‘n plek in die kwarteindronde verseker. September sê hulle onderskat nooit ʼn teenstander nie en Italië sal ʼn uitdaging wees:

# En nou na atletiek: Die wêreld se beste atlete kom vandag in Zurich, Switserland, byeen vir die laaste Diamantliga-byeenkoms. Ses Suid-Afrikaners neem deel aan die tweedaagse geleentheid. Die naellopers Akani Simbine, Shaun Maswanganyi en Bayanda Walaza gaan aan die 100-meter deelneem. Die wêreld se binnenshuise kampioen, Prudence Sekgodiso, neem deel aan die 800-meter, Zenéy van der Walt aan die 400-meter-hekkies en die Olimpiese silwermedalje-wenner Jo-Ané van Dyk aan die spiesgooi. Die internasionale sterre sluit in die Amerikaanse naelloper Noah Lyles en die Sweeds-Amerikaanse wêreldrekordhouer in paalspring, Armand Duplantis.

# Gholf: Die wenner van volgende jaar se Suid-Afrikaanse Ope sal ‘n uitnodiging kry na die Amerikaanse Meesterstoernooi. Die toernooi begin op 26 Februarie in Stellenbosch in die Wes-Kaap en sal waarskynlik ook deel bly van die kwalifiseringsreeks vir die 154ste Britse Ope. Dit beteken ‘n regstreekse roete vir lede van die Sonskyntoer na twee van die mees ikoniese Major-toernooie. Toer-kommissaris Thomas Abt beskryf dit as verdere erkenning van die toer as ‘n waardevolle lid van die internasionale gholf-ekostelsel.

# Oor na tennis: Die wêreld-nommer-een, Jannik Sinner, het sy poging om twee agtereenvolgende Amerikaanse Ope-titels te wen, afgeskop met ʼn oorwinning oor die Tsjeg Vit Kopriva. Die Italianer speel volgende teen die Australiër Alexei Popyrin, wat Emil Ruusuvuori van Finland in skoon stelle geklop het. Alexander Bublik van Kasakstan het 2014 se kampioen, Marin Cilic van Kroasië, uitgeskakel. In die vroueafdeling het Iga Swiatek van Pole maklik met Emiliana Arango van Colombië afgereken terwyl Naomi Osaka van Japan die Belg, Greet Minnen, afgeransel het om haar plek in die tweede ronde te verseker.

# En ons sluit af met motorsport: Sergio Perez van Mexiko en Valtteri Bottas van Finland keer volgende jaar terug na Formule Een nadat hulle bevestig is as die bestuurders vir die nuwe span, Caddilac. Perez het verlede jaar sy plek by Red Bull verloor terwyl Bottas die reserwe-bestuurder is vir sy voormalige span, Mercedes, nadat hy weg is by Sauber. Albei het meerjarige kontrakte gesluit met Cadillac, gesteun deur General Motors. Die span het ook gerugte verwerp dat Christian Horner, wat afgedank is as Red Bull se uitvoerende hoof, in ‘n bestuursrol aangestel kan word.

Bly ingeskakel vir meer nuus……………….