Sportnuus 12:30
BULLETIN SPORTNUUS 11 Desember 12.30 nm
Goeiemiddag. Ons kyk na die jongste sportnuus en uitslae:
# Krieket is eerste aan die beurt: Suid-Afrika het Pakistan met elf lopies verslaan in die eerste T20 op Kingsmead in Durban. David Miller het 82 lopies aangeteken en George Linde 48, en die Proteas het 183 vir nege in hulle 20 boulbeurte opgestapel. Linde het daarna vier paaltjies vir 21 lopies platgetrek, wat sy beste in T20 is, en Pakistan is tot 172 vir agt beperk. Linde sê hy is bly om terug te wees in die span:
Die kaptein van die Protea Vroue, Laura Wolvaardt, is intussen weer die nommer-een eendagkolwer in die wêreld, nadat sy Nat Sciver-Brunt van Engeland onttroon het. Dit volg na haar tellings van 59 nie uit nie en 35 in die eerste twee eendagwedstryde teen Engeland in Suid-Afrika. Sciver-Brunt is nou in die derde plek op die ranglys na Chamari Athapaththu van Sri Lanka. Nog ‘n Suid-Afrikaner, Chloé Tryon, het met agt plekke verbeter en is nou 17de. Onder die boulers het Marizanne Kapp met drie plekke verbeter tot sesde en haar plek behou as die veelsydigste speler.
# Vervolgens, swem: Die 22-jarige Rebecca Meder het die Afrika-rekord in die 200-meter individuele wisselslag verbeter op die Wêreld-kortbad-kampioenskap in Boedapest, Hongarye. Die Suid-Afrikaner het sesde geëindig in die eindronde in ʼn tyd van twee-minute-5,61-sekondes. Die vorige rekord van twee-minute-6,3-sekondes wat Kirsty Coventry van Zimbabwe in 2008 opgestel het, het langer as 16-jaar gestaan. Ruard van Renen is deur na die eindronde van die mans 100-meter rugslag nadat hy vierde gekom het in sy uitdun. Chad le Clos kon nie verder vorder as die uitdunne van die 50-meter vlinderslag nie.
# Nou rugby: Die afrigter van La Rochelle, Ronan O’Gara, sê hy sal bitter graag op internasionale vlak wil afrig, maar stel nie belang in Wallis nie, wat hulle laaste 12 wedstryde verloor het. Die voormalige Ierse losskakel het die Franse klub tot twee agtereenvolgende titels in die Kampioenebeker gevoer nadat hy hulpafrigter was by Racing 92 en die Crusaders. Volgens O’Gara is daar toetsafrigtingsposte wat hy baie graag sou wou hê maar daar is geen moontlike vakatures nie. Die Walliese afrigter, Warren Gatland, het vroeër gesê hy gaan sy toekoms in Cardiff met sy familie bespreek.
# Ons sluit af met gholf: Die wêreld nommer-een, Scottie Scheffler, is die PGA-toer se Speler van die Jaar, en sluit by Tiger Woods aan as die enigste speler wat die eer drie agtereenvolgende jare kon inpalm. Die Amerikaner het 91-persent van die stemme gekry. Scheffler spog met 13 PGA-toer-oorwinnings in sy loopbaan, waarvan sewe vanjaar. Hy het die eerste speler geword wat sy titel kon verdedig op die Spelerskampioenskap, en het sy tweede Amerikaanse Meesterskroon in drie seisoene ingepalm. Die 28-jarige is ook in Parys beloon met ‘n Olimpiese gouemedalje.
Bly ingeskakel vir meer nuus……………….