Sportnuus 12:30

BULLETIN SPORTNUUS 5 Desember 12.30 nm

Goeiemiddag. Ons kyk na die jongste sportnuus en uitslae:

# Ons begin met rugby: Die president van SA Rugby, Mark Alexander, beklemtoon weereens die Ackerley-sportgroep se belegging van 1,4-miljard-rand is noodsaaklik vir die volhoubaarheid van die sport te midde van ekonomiese uitdagings. ‘n Allerbelangrike stemmery vind môre plaas en benodig ʼn meerderheid van 75-persent om te slaag. Die regering het vrae oor deursigtigheid en die konsultantrol van die voormalige uitvoerende hoof, Jurie Roux, ten spyte van vorige finansiële wangedrag. Alexander sê indien die transaksie verwerp word, onderneem SA Rugby om alternatiewe beleggings te vind.

Nog rugby: Die Bulle se losvoorspeler, Mpilo Gumede, gaan die span se volgende drie wedstryde misloop na sy rooikaart in die Verenigde Rugbykampioenskapswedstryd teen Connacht. Hy is halfpad deur die tweede helfte afgestuur vir oogkrappery. Gumede het skuldig gepleit voor ‘n tugkomitee en sal nie beskikbaar wees vir die volgende twee Kampioenskapsbeker-kragmetings met Saracens en Northampton Saints, en die VRK-derby teen die Haaie nie. Connacht se flank, Sean Jansen, is vir ses weke geskors vir sy rooikaart in dieselfde wedstryd.

# Krieketnuus: Die Protea-vroue het ʼn skitterende vertoning gelewer en Engeland met ses paaltjies verslaan in die eerste eendagwedstryd in Kimberley. Die besoekers is uitgeboul vir 186 nadat Marizanne Kapp en Annerie Dercksen elk drie paaltjies platgetrek het. Kaptein Laura Wolvaardt het daarna ʼn onoorwonne 59 aangeteken – haar 33ste vyftigtal in eendagwedstryde. Nadine de Klerk het ʼn onoorwonne 48 bygedra en Suid-Afrika het die teiken gehaal met 70 balle oor. Die tweede van die drie eendagwedstryde vind Sondag in Durban plaas.

# Nou gholf: Die verdedigende kampioen, Max Homa, lei een van die sterkste velde van die Nedbank-uitdaagreeks by Sun City. Die Amerikaner wil die agste speler in die toernooi se geskiedenis word wat sy titel suksesvol verdedig. Saam met hom is sy landgenoot Will Zalatoris en die twee Kanadese, Corey Conners en Mackenzie Hughes. Thriston Lawrence lei ʼn sterk plaaslike groep wat Christiaan Bezuidenhout en Erik van Rooyen insluit. Lawrence sê dis altyd ʼn hoogtepunt om op die Gary Player-buiteklub te speel:

# Ons sluit af met fietsry: Die wêreld se langste enkelskof-bergfietswedren, die Desert Dash, begin vroeg môreoggend in die Namibiese hoofstad, Windhoek. Dit eindig 24-uur later by Swakopmund aan die kus na ‘n moordende 401 kilometer deur die Namib-woestyn. Meer as 900 fietsryers het ingeskryf vir die wedren, wat vanjaar die 20ste keer plaasvind. Daar is 80 tweepersoonspanne, 156 vierpersoonspanne en 190 enkeldeelnemers. Vyftien atlete gaan ook meeding in die kategorie vir e-fietse. ‘n Nuwe kategorie vir mense oor 50 is vanjaar ingestel.

Bly ingeskakel vir meer nuus……………….