Sportnuus 12:30

BULLETIN SPORTNUUS 27 November 12.30 nm

Goeiemiddag. Ons kyk na die jongste sportnuus en uitslae:

# Ons begin met krieket: Die Protea-vroue en Engeland pak mekaar vanaand in die tweede van drie T20s in Benoni, Gauteng. Die besoekers het Sondag die eerste wedstryd in Oos-Londen met vier paaltjies gewen na hulle die gasvroue tot 142 vir vyf beperk, en toe die teiken gehaal het met vier balle oor. Die laaste kragmeting vind Saterdag in Centurion plaas. Die twee lande speel daarna eendagwedstryde in Kimberley, Durban en Potchefstroom, gevolg deur ‘n eenmalige toets in Bloemfontein vanaf die 15de van volgende maand.

Nog krieketnuus: Die Internasionale Krieketraad vergader dié week oor die toekoms van die Kampioenetrofee-toernooi nadat Indië geweier het om in die gasheerland, Pakistan, te speel. Die IKR het die Pakistanse Krieketraad vroeër die maand ingelig dat Indië nie na Pakistan sal reis vir die toernooi van agt spanne nie, wat dit in die gedrang bring. Die Pakistanse Krieketraad het reeds voorstelle verwerp wat Indië sal toelaat om in ‘n neutrale land te speel en dring daarop aan dat die volledige toernooi in hulle land gespeel word.

# Vervolgens rugby: Ierland gaan Australië sonder vier staatmakers moet pak in Saterdag se toets in Dublin. Jamie Osborne en Jacob Stockdale is Saterdag beseer tydens hulle sege van 52-17 oor Fidji. Ryan Baird het vroeër die maand ʼn kopbesering opgedoen in hul oorwinning oor Argentinië, terwyl Tadhg Furlong weens ʼn dyspier-probleem nog nie hierdie maand gespeel het nie. Die voorspeler-afrigter, Paul O’Connell, sê die kragmeting met die Wallabies gaan ʼn groot uitdaging wees:

# Nou sokker: Manchester City het ʼn voorsprong van drie doele weggegooi en hul Kampioeneliga-wedstryd teen Feyenoord op die Etihad-stadion het gelykop geëindig met drie elk. Pep Guardiola se span kon nou in ses wedstryde na mekaar in alle kompetisies nie ‘n oorwinning behaal nie. Arsenal is weer terug op die wenpad met ʼn oortuigende sege van 5-1 oor Sporting. Robert Lewandowski het die derde speler geword wat 100 doele in die Kampioeneliga aanteken toe Barcelona 3-nul teen Brest gewen het. AC Milan, Bayern Munich en Atalanta het ook koning gekraai.

# Ons sluit af met nuus oor die Olimpiese Spele: Indië stel ook daarin belang om die Spele in 2036 aan te bied. Dit volg na die nuus dat ʼn uitvoerbaarheidstudie onder leiding van die Internasionale Olimpiese Komitee sal bepaal of Suid-Afrika gereed is om ʼn bod voor te lê. Die president van Wêreldatletiek, Sebastian Coe, wat ʼn kandidaat is om president te word van die IOK, sê hy is verheug oor Indië se aankondiging. Hy waarsku die land egter om die Spele te organiseer is een van die ingewikkeldste projekte ter wêreld.

Bly ingeskakel vir meer nuus……………….