Sportnuus 12:30

BULLETIN SPORTNUUS 26 November 12.30 nm

Goeiemiddag. Ons kyk na die jongste sportnuus en uitslae:

# Rugby is eerste aan die beurt: Die Blitsbokke het na die Verenigde Arabiese Emirate vertrek waar die nuwe seisoen van die sewes-wêreldreeks die naweek in Dubai begin. Die span het die vorige seisoen op ‘n hoogtepunt geëindig met brons op die Olimpiese Spele in Parys, maar kon slegs sewende eindig op die reeks se punteleer. Mede-kaptein Impi visser sê hulle het duidelike doelwitte vir die seisoen onder nuwe afrigter Philip Snyman, en behalwe om op die veld te wen wil hulle ook goeie mense van die veld af wees.

Vyftien-man-rugby: Die opwindende Springbok-agterspeler Sacha Feinberg-Mngomezulu gaan na verwagting na ‘n besering terugkeer vir die Stormers in die naweek se Verenigde Rugbykampioenskapswedstryd teen die Haaie in Durban. Hy het sy knie seergemaak tydens die Rugbykampioenskap en kon nie die Bokke se jaareindtoer in Brittanje meemaak nie. Die Stormers is tans 13de op die VRK-punteleer na slegs twee oorwinning in hulle vyf wedstryde. Die Haaie is negende na drie oorwinnings in vyf kragmetings.

# Vervolgens, krieket: Die ervare kolwer Kane Williamson keer terug vir Nieu-Seeland vir die drie toetse teen Engeland wat Donderdag in Christchurch begin. Hy het die onlangse toer in Indië weens ‘n liesbesering misgeloop. Afrigter Gary Stead sê die gewese kaptein sal een van die kolwers vervang wat hulle gehelp het om skoonskip te maak in die reeks van drie toetse. Hy sê hulle sien daarna uit om Williamson terug te hê met sy rekord. Die 34-jarige het agt-duisend-881 lopies aangeteken en 30 paaltjies geneem in sy 102 toetse vir Nieu-Seeland sedert 2010.

Die 13-jarige Vaibhav Suryavanshi het intussen die jongste speler geword wat in die Indiese Premierliga gekoop is toe die Rajasthan Royals hom vir 2,4-miljoen-rand aangeskaf het. Delhi Capital het op die tweede dag van die IPL-veiling vier-miljoen rand betaal vir die gewese Protea-kaptein, Faf du Plessis. Punjab Kings het die veelsydige Marco Jansen opgeraap vir 14-miljoen-rand, terwyl Mumbai Indians twee-miljoen-rand opgedok het vir die paaltjiewagter Ryan Rickelton. Suid-Afrika se tienersensasie, Kwena Maphaka, gaan vir 3,2-miljoen rand vir Rajasthan Royals speel.

# Ons sluit af met motorsport: Formule Een het in beginsel ‘n ooreenkoms met die Amerikaanse motorreus, General Motors, bereik dat sy Cadillac-handelsmerk van 2026 af as die elfde span sal deelneem. F1 het elke seisoen drie wedrenne in Amerika. General Motors se president, Mark Reuss, sê hulle is daartoe verbind om met passie en integriteit deel te neem om die sport wêreldwyd vir wedren-ondersteuners beter te maak. GM se toetrede sal die getal voertuigvervaardigers wat enjins vir F1 bou tot ses vermeerder. Die ander is Mercedes, Ferrari, Ford, Honda en Audi.

Bly ingeskakel vir meer nuus……………….