Sportnuus 12:30

BULLETIN SPORTNUUS 22 November 12.30 nm

Goeiemiddag. Ons kyk na die jongste sportnuus en uitslae:

# Ons skop af met rugby: Die gewese Springbok en gerespekteerde afrigter, Johan Ackermann, is aangewys as nuwe afrigterskonsultant vir die Junior Springbokke. Die 54-jarige Ackermann keer terug na Suid-Afrika na sewe jaar oorsee, waar hy Gloucester in Engeland en twee Japanese spanne afgerig het. Hy het die land in 2018 verlaat nadat hy die Leeus drie jaar na mekaar tot die eindstryd van Super Rugby gelei het. Ackermann was voorheen ook afrigter van Suid-Afrika A. SA Rugby beskryf sy terugkeer as fantasties vir Suid-Afrikaanse rugby, en glo het sal ‘n wonderlike mentor wees.

Nog rugby: Die veterane Sam Cane en TJ Perenara speel môreaand hulle laaste toets vir die All Blacks in La Nucia teen Italië. Cane, die gewese kaptein wat in 103 toetse vir Nieu-Seeland gespeel het, sal die nommer 7-trui dra, en die skrumskakel Perenara sal sy 89ste toets op die bank begin. Albei gaan volgende jaar in Japan speel en is dan nie vir die nasionale span verkiesbaar nie. Hoofafrigter Scott Robertson het vyf veranderings aangebring aan die span wat verlede naweek naelskraaps teen Frankryk verloor het.

# Vervolgens, gholf: Wynand Dingle en Stals Swart het met sewe onder baansyfer 65 geopen en loop saam voor na die eerste ronde van die Suid-Afrikaanse PGA-kampioenskap op St Francis Links in die Oos-Kaap. Hulle het is twee houe voor hulle naaste teenstanders, Estiaan Conradie, Heinrich Brjiners en JJ Senekal. Die driemalige wenner, Jaco van Zyl, het met ‘n ronde van vier onder baansyfer 68 geopen. Hy mik om by Harold Henning aan te sluit om die enigste ander speler te word wat Suid-Afrika se tweede oudste beroepstoernooi vier keer kon wen.

# Ons maak ‘n draai by tennis: Die verdedigende kampioen, Italië, het Argentinië twee-een geklop om deur te dring na die halfeindronde van die Davisbekertoernooi in Málaga, Spanje. Die Italianers het die eerste enkelspel verloor toe Lorenzo Musetti teen Francisco Cerundulo vasgeval het. Die wêreld nommer-een, Jannik Sinner, het Italië laat gelyk trek met ‘n sege oor Sebastian Baez. Hy het toe saam met Matteo Berrettini vir Maximo Gonzalez en Andre Molteni geklop in die beslissende dubbelspel. Die ander lande in die halfeindronde is die 28-malige kampioen, Australië, en Duitsland en Nederland.

# Ons sluit af met sokker: Manchester City se hoofafrigter, Pep Guardiola, het sy kontrak met twee jaar verleng, wat beteken hy sal tot 2027 by die klub aanbly. Sy kontrak sou aan die einde van die huidige seisoen verstryk. Die 53-jarige Spanjaard het in 2016 by Manchester City aangesluit en 18 trofees ingepalm, insluitend ses Premierliga-titels. Die kontrakverlenging volg na die nederlae teen Tottenham, Brighton, Sporting en Bournemouth. Guardiola sê sy fokus is om meer trofees saam met City te verower:

Bly ingeskakel vir meer nuus……………….