Sportnuus 12:30

BULLETIN SPORTNUUS 18 November 12.30 nm

Goeiemiddag. Ons kyk na die jongste sportnuus en uitslae:

# Rugby is eerste aan die beurt: Nieu-Seeland het sy tweede plek op die wêreldranglys aan Ierland afgestaan na die naweek se nederlaag met een punt teen Frankryk in Parys. Suid-Afrika het sy voorsprong boaan die punteleer met twee punte vergroot na Saterdag se oorwinning van 29-20 oor Engeland op Twickenham. Frankryk is steeds in die vierde plek, gevolg deur Argentinië, Skotland, Engeland, Fidji en Italië. Wallis bly in die 11de plek na hulle loesing van 52-20 teen die Wallabies, met Georgië in die 1e2d plek na hulle ‘n voorsprong teen Italië prysgegee het.

Wallis se afrigter, Warren Gatland, sê intussen hy sal nou oor sy toekoms besin nadat sy span sy elfde agtereenvolgende toets verloor het. Australië het Wallis gister in Cardiff 52-20 afgeransel. Gatland het ná die wedstryd met die Walliese Rugby-unie se voorsitter, Richard Collier-Keywood, en die uitvoerende direkteur van rugby, Nigel Walker, vergader. Wallis takel Saterdag die wêreldkampioen, Suid-Afrika. Gatland sê dis die uitdagendste tyd wat hy nog as afrigter beleef het:

# Ons maak ‘n draai by gholf: Dean Burmester van Suid-Afrika het die Vodacom Origins of Golf-titel met ‘n voorsprong van sewe houe oor Jean Hugo ingepalm na ‘n finale ronde van ses onder 66 op die Oubaai-gholflandgoed in George in die Wes-Kaap. Hy het die tweede grootste oorwinningsmarge in die geskiedenis van die reeks geëwenaar. Jacques Kruyswick het derde klaargemaak op 20 onder baansyfer. Burmester, wat sy eerste LIV Gholf-oorwinning in April in Miami behaal het, sê dit is baie spesiaal om voor sy familie en vriende te wen:

# Vervolgens, motorsport: Jorge Martin van Prima Pramac Racing het sy eerste MotoGP-wêreldkampioenskapstitel beklink toe hy derde geëindig het in die seisoen se laaste wedren in Barcelona. Die Italianer Francesco Bagnaia het die dag begin met ‘n agterstand van 19 punt, maar ‘n oorwinning op die Circuit de Barcelona-Catalunya was nie genoeg om die Spanjaard in te haal nie. Martin se 32 podiumplekke in snel- en wedrenne het hom ʼn voorsprong van tien punte en die titel verseker. Die Suid-Afrikaner, Brad Binder, was vyfde in die kampioenskap. Martin sê dis spesiaal om die kampioenskap te wen:

# Ons sluit af met tennis: Die wêreld se nommer een, Jannik Sinner, het ʼn skitterende seisoen afgesluit deur die eerste Italianer te word om die ATP-jaareindtoernooi te wen. Die 23-jarige het die Amerikaner Taylor Fritz in Turyn geklop. Sinner het met sy 70ste oorwinning van die seisoen by Roger Federer en Novak Djokovic aangesluit as die enigste mans wat in een seisoen die Australiese Ope, die Amerikaanse Ope en die ATP-jaareindtoernooi kon wen. Hy sê hy was self verras met sy gelykmatige spel hierdie seisoen:

Bly ingeskakel vir meer nuus……………….