Oggendkoerant-verslag
Die hooftrekke uit die belangrikste nuusblaaie soos op 27 Augustus 2025:
NASIONAAL:
# Business Day:
Berig die Suid-Afrikaanse lugredery Airlink se betalings uit Mosambiek word voortdurend geblokkeer en hy oorweeg dit om kaartjie-uitreiking in die land te staak. Die land skuld sowat 3,5-miljard-rand aan verskeie lugdienste en sukkel tans met buitelandse valutatekorte.
# En die Netwerk24-webblad:
Lei eerstens nogmaals met die Ohrigstad-plaasaanval en skryf oor die familie van die slagoffers se getuienis wat aangehoor is.
Dan word berig die Verkiesingskommissie sê hy is in gesprek met die Departement van Samewerkende Regering en Tradisionele Sake om seker te maak aanstaande jaar se verkiesing verloop vlot.
En laastens skryf die koerant sangsensasie Taylor Swift en die NFL-speler Travis Kelce is uiteindelik verloof.
GAUTENG:
# The Star:
Skryf Rise Mzansi, die GOOD-party en BOSA gaan ‘n samesmelting in ‘n nuwe sentristiese politieke party aankondig voor die plaaslike regeringsverkiesing van 2026. Betroubare bronne het aan die koerant bevestig dat besprekings aan die gang is, met die fokus op idees gewortel in eenheid en verbeterde dienslewering.
# Sowetan:
Berig die speurders in die omstrede sluipmoordsaak van DJ Sumbody wat die polisie tans ondersoek, word voltyds deur lyfwagte opgepas.
# En The Citizen:
Skryf die DA se moontlike burgemeesterskandidaat vir Johannesburg, Helen Zille sê daar is baie probleme in die stad maar dit kan ná 30 jaar reggestel word.
WES-KAAP:
# Die Burger:
Berig eerstens die Madlanga-kommissie oor inmenging in die strafregstelsel gaan nie meer op 1 September met sy werksaamhede begin nie. Die vernaamste rede is omdat alles nie betyds in plek gestel kan word nie. Twee top-amptenare van die Departement van Justisie en Staatkundige Ontwikkeling is afgedank oor die vertraging.
En tweedens skryf die koerant die minister van Binnelandse Sake, Leon Schreiber wil die sowat 18-miljoen groen ID-boekies vervang.
OOS-KAAP:
# Daily Despatch in Oos-Londen:
Berig die nuwe roetes wat FlySafair tussen Lanseria en die Oos-Kaap ingestel het, het ten doel om toerisme ‘n hupstoot te gee.
En skryf die Oos-Kaapse regering gaan ‘n deurtastende ondersoek by alle skoolkombuise in die provinsie uitvoer.
KWAZULU-NATAL:
# The Witness in Pietermaritzburg:
Berig die inwoners van Msunduzi gaan weer gebuk onder ‘n geheimsinnige rioolreuk.
En skryf die burgemeester van die uMngeni-munisipaliteit, Chris Pappas het ‘n spesiale geleentheid vir bejaardes aangebied.
En ten slotte uit NAMIBIË:
# Republikein in Windhoek:
Berig lede van privaat mediese fondse kan binnekort gevra word om toestemmingsbriewe te onderteken dat hul mediese inligting gedeel mag word. Dit word gesien as om die reg van privaatheid af te staan.
Dan skryf die koerant president Netumbo Nandi-Ndaitwah het tydens Heldedagvieringe in Katima Mulilo weer eens beklemtoon “ons is te min om arm te wees”.
En laastens is daar nuus oor Janine van Zyl van Namibië wat die Van Rhyn-trofee by die toekenningsgeleentheid van die Instituut vir Kaapse Wynmakers gewen het.