Oggendkoerant-verslag
Die hooftrekke uit die belangrikste nuusblaaie soos op 10 Desember 2024:
NASIONAAL:
# Business Day:
Berig die brandstofkwessie by die OR Tambo Internasionale Lughawe gister het Suid-Afrika se toerismebedryf ‘n verdere knou toegedien. Die koerant skryf die ontwrigting is veroorsaak is deur ‘n foutiewe klep wat gelei het tot ure lange vertragings na bestemmings soos Nairobi, Mauritius, Abu Dhabi en Antananarivo.
GAUTENG:
# Beeld:
Berig André van Rooyen en Zinea Bergh is met hul terugkeer van hul vermoorde vriend, Luan Robberts se gedenkdiens in Rustenburg in ‘n motorongeluk dood.
Dan skryf die koerant die meeste Gautengse leerders is geplaas vir volgende jaar. Daar is egter sowat 19-duisend wat nie geplaas kon word nie weens foutiewe aansoeke.
En laastens is daar nuus oor ‘n ma van twee wat die Powerball Plus-boerpot van 14-miljoen-rand gewen het.
# The Star & Pretoria News:
Skryf ook oor die chaos by OR Tambo gister en die honderde passasiers wat doelloos moes wag om te vertrek.
En berig beurtkrag kan dalk terugkeer in 2025.
# Sowetan:
Berig oor ‘n skoolhoof wat 400-duisend-rand in die sogenaamde Manana-bedrogspul verloor het. Hy is een van tientalle wat geld verloor het.
# En The Citizen:
Bespiegel oor die politieke toekoms van die Gautengse premier, Panyaza Lesufi. Die koerant vra of hy sy tyd uitgedien het.
VRYSTAAT:
# Volksblad in Bloemfontein:
Berig een van die twee vroueverdagtes in die plaasmoord in Goedemoed het teenoor die polisie erken dat sy en haar kêrel voor die plaasaanval ‘n tweejarige seuntjie doodgemartel het. Die kind se liggaam is deur die polisie gevind.
En tweedens skryf die koerant dit blyk dat 2024 die warmste jaar op rekord gaan wees.
WES-KAAP:
# Die Burger:
Berig die voorsitter van die DA se federale raad, Helen Zille sê die kwessie rondom die Bela-wet is die vernaamste toets vir die regering van nasionale eenheid.
En tweedens word berig die nasien van matriekvraestelle in die Wes-Kaap vorder goed en die Wes-Kaapse Onderwysdepartement verwag ‘n slaagsyfer van minstens 80-persent.
# En Cape Argus:
Skryf met die begin van die feestyd het die Stad Kaapstad se nooddienste reeds ‘n toename van 25-persent in noodgevalle ondervind.
En berig oor die uitstel van die afskakeldatum van analoog-TV na 31 Maart 2025.
OOS-KAAP:
# The Herald in Gqeberha:
Berig oor probleme met skoon drinkwater op die Oos-Kaapse platteland.
En tweedens skryf die koerant die Gqeberha-skrywer Madoda Ndlakuse het twee toekennings ontvang tydens die eerste jaarlikse Oos-Kaapse literêre toekenningsgeleentheid.
KWAZULU-NATAL:
# Daily News in Durban:
Skryf betogers van die DA het die oënskynlike rassistiese aanval op een van hulle raadslede veroordeel
En ten slotte uit NAMIBIË:
# Republikein in Windhoek:
Vandag is Menseregte- en Vrouedag in Namibië en daar verskyn dus geen koerant nie.