Oggendkoerant-verslag
Die hooftrekke uit die belangrikste nuusblaaie soos op 06 Desember 2024:
NASIONAAL:
# Business Day:
Berig African Bank het na vore getree as die voorkeurbieër vir Eskom se personeelhuislenings in ‘n ooreenkoms wat na verwagting teen Mei 2025 gesluit sal word. Die koerant skryf die transaksie is ‘n belangrike mylpaal vir beide maatskappye.
# En Mail & Guardian op Vrydae:
Skryf die chaos in Suid-Afrika se onwettige myne is besig om verder uit te kring met ‘n groep families in Krugersdorp wie se naasbestaandes in ‘n oorstroomde myn vasgevang is sonder enige hulp.
GAUTENG:
# Beeld:
Berig eerstens oor die uitwerking van die vlieënierstaking by die Suid-Afrikaanse Lugdiens wat honderde mense gestrand gelaat het op lughawens regoor Suid-Afrika. Die koerant skryf die onderhandelinge oor salarisverhogings gaan onverpoosd voort.
Dan skryf die koerant Anton Bouwer wat in die Kemptonpark-streekhof tereg staan op vier moordklagtes en een van poging tot moord mag moontlik nou ook van die moord op sy broer aangekla word. Bouwer het verskeie van sy gesinslede in ’n wilde moordtog doodgeskiet.
En laastens skryf die koerant adjunkpresident Paul Mashatile het die ongevraagde edelsteen wat hy van die diamanthandelaar Louis Liebenberg ontvang het teruggegee.
# Sowetan:
Berig daar heers algehele paniek oor die spertyd vir die registrasie van spazawinkels. Die sakeforum berig talle eienaars het opgehou om voorraad aan te koop omdat die toekoms onseker is.
# En The Citizen:
Skryf oor die skok ná AfriForum se verslag oor die watergehalte in die land. Dit dui aan dat 13-persent van die drinkwater in die land nie geskik is vir menslike gebruik nie.
VRYSTAAT:
# Volksblad in Bloemfontein:
Berig die minister van Elektrisiteit en Energie, Kgosientsho Ramokgopa het gister ingetree om die geskil tussen Eskom en die munisipaliteit van Tokologo uit die weg te ruim en só ‘n kragkrisis vir Boshof, Dealesville en Hertzogville voorkom.
Dan skryf die koerant die Rhodes- en Sol Plaatje-standbeeld in Kimberley is met onskadelike rooi klei besmeer as deel van ‘n kunsprotes.
En laastens is daar nuus oor die Bokafrigter, Rassie Erasmus se dogter Carli wat vandag vir Kaapstad se o.21-netbalspan speel.
WES-KAAP:
# Die Burger:
Berig volgens ‘n internasionale studie wat die standaard van leerders bepaal, het Suid-Afrika se graad 5-leerders die swakste ter wêreld presteer ten opsigte van wiskunde en wetenskap. Die graad 9-leerders was 39ste uit 44 lande.
En tweedens skryf die koerant ook oor Mashatile se edelsteen.
# En Cape Argus:
Skryf die voormalige Media24-bestuurder en oudonderwyser, Willem Breytenbach sal op 9 Desember gevonnis word nadat hy skuldig gepleit het op 10 aanklagte wat verband hou met seksuele aanranding op minderjariges.
OOS-KAAP:
# The Herald in Gqeberha:
Berig Athuxolo Mdingi van Motherwell is verpletter nadat haar 18-maande oue seuntjie in sy tante se arms doodgeskiet is.
En tweedens skryf die koerant Willem Oliphant wat nie daarin kon slaag om as president van die OP-rugbyunie verkies te word nie, het nou ook ‘n aanbod van die pasverkose president George Malgas verwerp om ‘n lid te word van ‘n nuwe kommersiële tak wat die unie wil stig.
KWAZULU-NATAL:
# Daily News in Durban:
Skryf KwaZulu-Natal wil sy padsterftes oor die feesseisoen met vyf-persent afbring.
En ten slotte uit NAMIBIË:
# Republikein in Windhoek:
Berig Namibië se aangewese president, Netumbo Nandi-Ndaitwah, het ’n beroep op Swapo-lede gedoen om saam te werk tot voordeel van die land.
Dan skryf die koerant die weduwee van die man wat vier jaar gelede by Avisdam wreed vermoor is, het getuig oor die dag van sy dood.
En laastens is daar nuus oor ’n leerder van Gobabis, Melanie van der Merwe wat ‘n gemeenskapsprojek begin het onder weerlose, minderbevoorregte kinders. Sy is as Miss Teen Hope Journey International aangewys.