Oggendkoerant-verslag
Die hooftrekke uit die belangrikste nuusblaaie soos op 03 Desember 2024:
NASIONAAL:
# Business Day:
Berig die voorsitter van die Universiteit Stellenbosch-raad, Nicky Newton-King en die rektor en visekanselier, Wim de Villiers is slegs oor die vingers getik omdat hulle nie die wysigings aan die Wilgenhof-verslag gekommunikeer het nie. Die versuim is vroeër as wesenlik bestempel.
GAUTENG:
# Beeld:
Berig die Stad Tshwane het ‘n ooreenkoms aangegaan met Eskom om sy munisipale skuld van meer as ses-miljard-rand oor die volgende vyf jaar te vereffen. Die eerste paaiement van 400-miljoen-rand word in Desember betaal.
En tweedens het die koerant ‘n foto van die 45 meter hoë kersboom bekend as die Baken van Hoop wat buite Brits opgerig is. Dit is Afrika se hoogste kersboom en versier met 40-duisend-liggies.
# The Star & Pretoria News:
Skryf die ANC het sy lede wat bande met die MK-party het, ernstig gewaarsku.
En berig werknemers van die uitgebreide openbarewerkeprogram word nou reeds vir drie maande nie betaal nie.
# Sowetan:
Lei met die opskrif: “VAAL DAM DRY, BUT DON’T PANIC”. Die koerant skryf die ministerie van Water en Sanitasie het die versekering gegee hy sal steeds water aan Gauteng kan verskaf al val die dam onder minimum-vlak.
# En The Citizen:
Skryf TLU SA het gewaarsku dat indien die Onteieningswetsontwerp goedgekeur word dit ‘n ernstige uitwerking op voedselproduksie in Suid-Afrika kan hê.
VRYSTAAT:
# Volksblad in Bloemfontein:
Berig die Vrystaat Landboukollege en die Landboukollege Vrystaat is in ‘n hofstryd gewikkel oor gelyksoortige name. Die VSLK glo hy is die enigste een geregtig op die naam.
En tweedens skryf die koerant Drikus Coetzee van Namibië het vir die tweede agtereenvolgende jaar die moordende Munga-fietsmarathon van Bloemfontein na Kaapstad gewen.
WES-KAAP:
# Die Burger:
Berig soos Business Day oor die Wilgenhof-verslag van die Universiteit Stellenbosch. Die koerant skryf die besluit om die koshuis tydelik te sluit bly egter staan.
En tweedens is daar ‘n berig oor ‘n hartseer reddingspoging in die Sondagsrivier toe die 20-jarige Aden Niekerk verdrink het toe hy probeer het om ‘n 17-jarige meisie te red.
# En Cape Times:
Skryf president Cyril Ramaphosa sê die BELA-wet gaan voort, en daar word slegs twee klousules bespreek.
En berig oor die brandstofpryse wat in Desember op motoriste wag.
OOS-KAAP:
# The Herald in Gqeberha:
Berig ook oor die reddingspoging wat tragies geëindig het toe Aden Niekerk, wat ‘n meisie probeer red het, verdrink het.
En tweedens skryf die koerant die inwoners van Missionvale het saamgewerk en inligting verskaf wat gelei het tot die arrestasie van twee leiers van ‘n rowerbende wat die gemeenskap geteister het.
KWAZULU-NATAL:
# Daily News in Durban:
Skryf die speaker van eThekwini, Thabani Nyawose, word beskuldig dat hy die DA-raadslid, Fatima Ismail wat na bewering rassistiese uitsprake gemaak het, beskerm.
En ten slotte uit NAMIBIË:
# Republikein in Windhoek:
Berig die voormalige SWAPO eerste minister, Nahas Angula sê verlede week se nasionale verkiesing was die swakste sedert Namibië se onafhanklikwording.
En tweedens skryf die koerant dit is byna ‘n jaar nadat die sogenaamde Fishrot-beskuldigdes vir die eerste keer in die Hoërhof in Windhoek verskyn het en sedertdien was daar geen vordering met die saak nie.