Oggendkoerant-verslag

Die hooftrekke uit die belangrikste nuusblaaie soos op 25 November 2024:

NASIONAAL:

# Business Day:

Berig duisende werkgewers het versuim om hul verpligte pensioenfondsbydraes ten bedrae van altesaam 5,2-miljard-rand vir werknemers te maak, en die Gedragsowerheid vir die Finansiële Sektor het die name van sommige van die skuldiges begin publiseer.

GAUTENG:

# Beeld:

Staan vandag soos Volksblad en Die Burger sy voorblad af aan die afsterwe van die Suid-Afrikaanse ikoon Breyten Breytenbach wat in Frankryk oorlede is. Die koerant skenk aandag aan sy politieke bewustheid en sy ryk versameling van werke.

# The Star & Pretoria News:

Skryf die uitstel wat Eskom verleen het ten opsigte van die opgradering van kragmeters verlig nie die frustrasie van verbruikers nie.

En berig Jacob Zuma wou glo aanbly as lid van die ANC.

# Sowetan:

Lei met: “OUR KIDS KEEP DYING”. Die koerant berig oor die jongste voorval in Soweto waar ‘n kind aan voedselvergiftiging dood is. Daar is ‘n beroep dat alle spazawinkels gesluit word totdat hulle gerigstreer is.

# En The Citizen:

Skryf volgens ‘n opname van die Ichikowitz-familiestigting is slegs 16-persent van Suid-Afrika se jeug positief oor die land se toekoms en voel die meeste jong mense hulle is in die steek gelaat.

VRYSTAAT:

# Volksblad in Bloemfontein:

Het dieselfde hoofberig as Beeld oor Breyten Breytenbach.

WES-KAAP:

# Die Burger:

Staan ook sy voorblad af aan die dood van Breyten Breytenbach.

# En Cape Times:

Berig die beëindiging van Zuma se lidmaatskap van die ANC stuur nou op ‘n regsgeding af.

En skryf die stryd teen bek-en-klou-seer is nog ver van gewonne.

OOS-KAAP:

# The Herald in Gqeberha:

Berig ’n ernstige tekort aan ambulanse en mediese personeel in klein dorpies regoor die Oos-Kaap het wyksraadslede en inwoners genoop om self pasiënte te alle ure van die nag na hospitale te vervoer.

En tweedens skryf die koerant met die komende vakansieseisoen voor die deur bestaan daar kommer oor Nelson Mandelabaai se strande. Daar is swak infrastruktuur, kommer oor veiligheid en die uitwerking van onlangse natuurverskynsels.

KWAZULU-NATAL:

# Daily News in Durban:

Skryf soos Cape Times dat Zuma se uitsetting uit die ANC op ‘n regsgeding afstuur.

En ten slotte uit NAMIBIË:

# Republikein in Windhoek:

Berig stembeamptes in Rundu dreig met ‘n boikot as die Verkiesingskommissie van Namibië nie hul vergoeding aanpas nie.

En skryf Ongwediva Medipark moet sy sy geskorste besturende direkteur heraanstel.