Oggendkoerant-verslag
Die hooftrekke uit die belangrikste nuusblaaie soos op 05 November 2026:
NASIONAAL:
# Business Day:
Berig die kiesersopkoms in die plaaslikeregeringsverkiesing kan die Suid-Afrikaanse politieke landskap herontwerp. Die koerant skryf teen laatmiddag het reeds meer as 40-persent van Suid-Afrika se kiesers gestem.
# En die Netwerk24-webblad:
Berig president Cyril Ramaphosa wou gister nadat hy gestem het, homself nie uitlaat oor die vorming van koalisies tussen die ANC en die DA nie.
En die webblad skryf tweedens meer Suid-Afrikaners het gister gestem oor dienslewering as in 2021. Ramaphosa het die verkiesingsopkoms as bemoedigend beskryf.
GAUTENG:
# The Star:
Skryf die Amerikaanse dollar en internasionale oliepryse het verswak namate markte gereageer het op die Amerikaanse middeltermynverkiesingsnederlaag vir president Donald Trump. Die koerant skryf Demokrate kan nou wetgewing blokkeer, ondersoeke na Trump se administrasie instel en sy regterlike en senior regeringsaanstellings dwarsboom. Volgens kenners is die risiko geleë in die onsekerheid oor hoe Trump in die komende maande kan optree.
# Sowetan:
Lei met: “BRAVO SA, FOR SHOWING UP!” Die koerant berig teen laatmiddag het 12-miljoen kiesers reeds hul kruisies getrek wat die 2021-stempersentasie kan oortref. Volgens die OVK het oud en jonk gestem en daar was slegs klein uitdagings wat aangespreek kon word.
# En The Citizen:
Skryf miljoene Gautengers het opgeruk na die stembusse en die boodskap was eenparig: Ons stem vir verandering.
WES-KAAP:
# Die Burger:
Berig eerstens oor stemdag gister in die Wes-Kaap waar Kapenaars in groot getalle opgedaag het om in warm weersomstandighede te stem. Die koerant skryf ook oor die DA se burgemeesterskandidaat in Johannesburg, Helen Zille, wat hoop op ‘n volstrekte meerderheid.
Dan skryf die koerant oor die Demokrate se reuse-oorwinning in die VSA waar die verkiesing ‘n regstreekse vingerwysing vir president Trump is. Daar word ook berig dat die verandering moontlik positiewe gevolge vir Suid-Afrika kan inhou.
En laastens is daar nuus oor die gemartelde boer van Ventersorp, Donovan Marx, wat ‘n insinking in sy toestand gehad het maar steeds bestendig is.
OOS-KAAP:
# The Herald in Gqeberha:
Het verskeie foto’s van gister se verkiesing op sy voorblad en berig met die stemlokale wat gesluit het, wag almal op die uitslae en dan begin die stryd om die beheer van die Nelson Mandelabaai-metro.
KWAZULU-NATAL:
# The Witness in Pietermaritzburg:
Skryf in KwaZulu-Natal het talle jong kiesers by stemlokale opgedaag om hul stemme uit te bring.
En berig tweedens Chris Pappas se naamgenoot in die VSA het sy senaatsetel in New Hampshire gewen as eerste openlike gay senator.
En ten slotte uit NAMIBIË:
# Republikein in Windhoek:
Berig die Vereniging vir Uraanmynbou in die Stampriet-akwifer eis die volledige blootlegging van die Namibiese regering se goedkeuring en voorsorgmaatreëls om grondwater in die akwifer te beskerm.
En tweedens skryf die koerant die Ombuds-wetsontwerp bevat omvattende wysigings vir beter kinderbeskerming.