Nuus 18:00

BULLETIN NUUSAGENTSKAP 21 November 6 nm

Goeiemiddag. Ek is……..

In die bulletin:

# Ramaphosa beskuldig Israel van oorlogsmisdade en volksmoord in Gaza
# Die Chinese president vra vir ‘n internasionale vredeskonferensie oor Israel/Hamas
# En, rugby: Dupont gaan die Sesnasies misloop om sewes te speel by Olimpiese Spele in Parys

# President Cyril Ramaphosa het Israel beskuldig van oorlogsmisdade en volksmoord in Gaza. Die president het as die voorsitter van ‘n buitengewone beraad van die BRICS-groep gesê die gesamentlike straf van Palestynse burgerlikes met die onwettige gebruik van geweld, is ‘n oorlogsmisdaad. Hy het verder die doelbewuste weiering van toegang tot medisyne, brandstof, kos en water aan inwoners van Gaza as gelykstaande aan volksmoord beskryf. Ramaphosa doen ‘n beroep op alle nasies om saam te werk om ‘n regverdige, vreedsame en veilige toekoms vir die mense van beide Palestina en Israel te verwesenlik.

China se president, Xi Jinping, vra intussen vir ‘n internasionale vredeskonferensie om die konflik tussen Israel en Hamas te besleg. Hy het ‘n virtuele beraad van BRICS-leiers toegespreek. Volgens Xi kan daar geen volhoubare vrede en veiligheid in die Midde-Ooste wees sonder ‘n billike oplossing vir die kwessie van Palestina nie. Hy stel voor ‘n internasionale vredeskonferensie moet spoedig belê word wat meer gewig sal dra om ŉ internasionale konsensus vir vrede te bou.

# Die Landdroshof in Middelburg, Mpumalanga het die saak teen die voormalige uitvoerende hoof van Eskom, Matshela Koko, van die rol geskrap. Koko en sy medebeskuldigdes, insluitend sy vrou en twee stiefdogters, staan tereg op aanklagte van bedrog, korrupsie en geldwassery wat verband hou met kontrakte ter waarde van 2,2-miljard-rand vir werk by die Kusile-kragstasie. Die aangeleentheid kan later weer na die hof terugkeer. Koko het buite die hof gesê die regstappe teen hom was ‘n misdaad en ‘n poging om sy gesin te vernietig:

# Die DA het president Cyril Ramaphosa en die minister van Openbare Ondernemings, Pravin Gordhan, van mislukte leierskap beskuldig oor die uitdagings by Transnet-hawe-terminale. Die DA se nasionale woordvoerder vir Openbare Ondernemings, Mimmy Gondwe, sê albei leiers het hul grondwetlike pligte versuim, om die ekonomie te beskerm tydens die ergste krisis vir handel- en uitvoerhawens in dekades. Gondwe doen ‘n beroep op Ramaphosa en Gordhan om die leiding te neem en met belanghebbendes in die uitvoersektor en Transnet-bestuurders te skakel en aandag aan agterstande te gee en langtermynoplossings te vind:

# Rugby: Frankryk se 15-man-kaptein, Antoine Dupont, gaan volgende jaar die Sesnasiesreeks misloop sodat hy sewes kan speel op die Olimpiese Spele in Parys. Die skrumskakel is ook die kaptein van Toulouse en is die tweede keer as die Top 14 se speler van die jaar aangewys, maar dis onseker of hy steeds vir die klub gaan speel wanneer hy vroeg volgende jaar oorskakel na sewes. Eurosport berig Dupont se afwesigheid in die Sesnasies sal ŉ probleem skep vir die toetsafrigter, Fabian Galthié, wat nou ŉ nommer nege en ŉ kaptein moet aanwys.

# En die finansiële aanwysers: Die rand verhandel teen 18-rand-37-sent teen die dollar, 20-rand-13-sent teen die euro en 23-rand-6-sent teen die pond. Bitcoin verhandel teen 36-duisend-947-dollar-40-sent. Die prys van goud is een-duisend-999-dollar-36-sent per fynons en die prys van Brent ruolie 81-dollar-79-sent per vat.

Bly ingeskakel vir meer nuus……………….