Nuus 18:00

BULLETIN 30 Junie 6 nm

Goeiemiddag. Ek is……..

In die bulletin:

# ‘n Kenner sê die vrees vir vergelding maak dit moeilik vir juniors om seniors se seksuele toenadering te verwerp
# AfriForum sê Suid-Afrika se misdaadkrisis noodsaak die afwenteling van polisiemagte 
# En rugby: Itoje voer die Britse en Ierse Leeus die eerste keer aan in Woensdag se wedstryd teen die Reds

# ‘n Geslagskenner van die Universiteit van die Witwatersrand, Lisa Vetten, sê magsdinamika in die werksplek maak dit moeilik vir juniors om vir seniors nee te sê. Sy getuig voor die tribunaal wat beweerde seksuele teistering ondersoek teen ‘n regter van die Oos-Kaapse Hooggeregshof. Selby Mbenenge word daarvan aangekla dat hy tussen 2021 en ’22 ongewenste toenadering gemaak het teenoor die hofsekretaresse, Andiswa Mengo. Vetten het in Sandton, Johannesburg, beklemtoon dat die vrees vir viktimisering en vergelding dikwels slagoffers stilmaak:

# AfriForum waarsku Operasie Shanela Twee kan moontlik misluk sonder ingrypende hervorming en gedesentraliseerde wetstoepassingsmagte. Die organisasie verwelkom nasionale pogings om misdaad te beveg, maar wys daarop dat die regering se gesentraliseerde wetstoepassingsmodel herhaaldelik misluk het. Jacques Broodryk van AfriForum sê plaaslike sekerheidstrukture soos omgewings- en plaaswagte is in baie omgewings doeltreffender en moet beter ondersteun word:

# SANParke vra besoekers aan die Krugerwildtuin om vooraf te bespreek en die reëls na te kom gedurende die skoolvakansie wat tot 21 Julie duur. Woordvoerder JP Louw sê hekkwotas en tydgleuwe sal toegepas word, met bykomende personeel wat verkeersveiligheid en gedrag monitor. Louw beveel besoekers aan om ritte noukeurig te beplan, aanwysingsborde te respekteer en amptelike platforms dop te hou vir die jongste inligting oor padsluitings en kennisgewings. Voertuie sonder nommerplate sal nie in die wildtuin toegelaat word nie.

# Ten minste 935 mense is in Iran dood tydens sy oorlog van 12-dae teen Israel. Volgens Iranse staatsmedia sluit die dodetal 132 vroue en 38 kinders in. Israel het ‘n reuse-bomveldtog geloods wat senior militêre bevelvoerders en kernwetenskaplikes doodgemaak het. Die aanvalle het militêre basisse, kernaanlegte en ook woongebiede getref. Iran se teenreaksie het missielgolwe en hommeltuigaanvalle ingesluit wat groot stede soos Tel Aviv en Haifa getref het, en volgens Israelse owerhede is 28 mense dood. ‘n Wapenstilstand tussen Iran en Israel het op 24 Junie in werking getree.

# Rugby: Toerkaptein Maro Itoje sal die eerste keer die Britse en Ierse Leeus aanvoer wanneer hulle Woensdag teen Queensland Reds speel in Brisbane, Australië. Hoofafrigter Andy Farrell het 14 veranderings aan die opdrafspan aangebring wat Western Force Saterdag in Perth 54-7 afgeransel het, met slegs die losskakel Finn Russell wat oorbly. Sy skakelmaat is Jamison Gibson-Park, met die Ierse slot James Ryan wat sy buiging van die bank sal maak. Intussen is die Wallieser Tomos Williams op pad huis toe nadat hy in Perth beseer is.

# En die finansiële aanwysers: Die rand verhandel teen 17-rand-78-sent teen die dollar, 20-rand-86-sent teen die euro en 24-rand-35-sent teen die pond. Bitcoin verhandel teen 107-duisend-345-dollar. Die prys van goud is drie-duisend-282-dollar-67-sent per fynons en die prys van Brent-ruolie is 66-dollar-49-sent per vat.

Bly ingeskakel vir meer nuus……………….