Nuus 18:00

BULLETIN NUUSAGENTSKAP 9 Desember 6 nm

Goeiemiddag. Ek is……..

In die bulletin:

# Die SA Sionistefederasie beskuldig die regering van misbruik van openbare fondse vir ‘n politieke veldtog teen Israel
# Die gewese onderwyser en joernalis Willem Breytenbach word gevonnis tot vyf jaar vir seksuele aanranding
# En, krieket: Slegs die Proteas, Australië en Indië is nog in die wedloop vir die eindstryd van die  Wêreldtoetskampioenskap

# Die Suid-Afrikaanse Sionistefederasie veroordeel die regering omdat hy 95-miljoen-rand aan belastingbetalersgeld bestee het aan ‘n regsaak teen Israel by die Internasionale Strafhof. Die organisasie glo dis ‘n vermorsing van openbare fondse, veral weens Suid-Afrika se hoë werkloosheidsyfer van 41,9-persent. Die fondse is deur die Parlement se Wetsontwerp op Spesiale Bewilligings goedgekeur en sluit 3,47-miljoen-rand in vir die regspan se reise in besigheidsklas. Woordvoerder Rolene Marks vra die Parlement om die wetsontwerp te verwerp en kritiseer die regering se fokus op buitelandse kwessies in plaas van binnelandse probleme.

# Die gewese onderwyser en Media24-joernalis, Willem Breytenbach, is tot vyf jaar gevangenisstraf gevonnis vir seksuele en onsedelike aanranding. Hy het verlede week in die Kaapstadse Streekhof skuld beken op sewe aanklagte van onsedelike aanranding en drie van seksuele aanranding. Die hof het sy skulderkenning aanvaar op grond van ‘n polisieondersoek wat gevloei het uit Deon Wiggett se potgooi-uitsending, My Only Story. Breytenbach mag ook nie met kinders werk nie en sy naam word gevoeg op die registers vir nasionale kinderbeskerming en seksoortreders.

# Buitelandse spazawinkel-eienaars worstel tans met uitdagings om hul ondernemings te registreer weens ‘n agterstand in asieldokumente, wat terugdateer tot 2018. ‘n Vereniging wat buitelandse spazawinkel-eienaars verteenwoordig, het ‘n beroep gedoen vir ‘n verlenging van ses-maande in die registrasiesperdatum en versoek Binnelandse Sake om te help. Die vereniging het aan Newzroom Afrika gesê die agterstand, vererger weens die Covid-19-pandemie, het dit vir baie mense onmoontlik gemaak om aan registrasievereistes te voldoen, wat hul in gevaar stel om van die proses uitgesluit te word.

# Gautengse ouers het tot die einde van volgende maand om hul graad een- en agt-kinders se skoolplasings af te handel. Meer as 325-duisend leerders is suksesvol geplaas vir die 2025-skooljaar. Agt-duisend-379 graad een-aansoeke en tien-duisend-653 graad agt-aansoeke was egter onvolledig. Die LUR vir Onderwys, Matome Chiloane, sê laat aansoeke kan vanaf Woensdag aanlyn ingedien word. Hy versoek ouers om die volledige en korrekte dokumentasie in te dien:

# Krieket: Slegs Suid-Afrika, Australië en Indië kan nog die eindstryd van die Wêreldtoetskampioenskap haal. Die Proteas het tot die boonste plek verbeter nadat hulle vandag in Gqeberha 2-nul skoonskip gemaak het in die reeks teen Sri Lanka, met Australië tweede en Indië derde. Die Protea-bouler Dane Paterson is as speler van die wedstryd aangewys en kaptein Temba Bavuma as speler van die reeks. Bavuma sê hulle besef oorwinnings in die komende twee toetse teen Pakistan sal hulle tot die eindstryd laat deurdring:

# En die finansiële aanwysers: Die rand verhandel teen 17-rand-80-sent teen die dollar, 18-rand-82-sent teen die euro en 22-rand-73-sent teen die pond. Bitcoin verhandel teen 99-duisend-121-dollar. Die prys van goud is twee-duisend-665-dollar-63-sent per fynons en die prys van Brent-ruolie 72-dollar-2-sent per vat.

Bly ingeskakel vir meer nuus……………….