Nuus 18:00

BULLETIN NUUSAGENTSKAP 6 Desember 6 nm

Goeiemiddag. Ek is……..

In die bulletin:

# SAL-vlieëniers se staking lei tot afgestelde vlugte en verhoed die Parlement se oorsigbesoek
# Steenhuisen gee Lesufi die skuld vir die verergerende waterkrisis in Gauteng 
# En, rugby: Drie Suid-Afrikaanse spanne speel in die moeilike Kampioenebeker-kompetisie

# Ontwrigting weens die staking van die Suid-Afrikaanse Lugdiens se vlieëniers het daartoe gelei dat die Parlement se portefeuljekomitee op Justisie sy oorsigbesoek moes afstel. Die staking, wat gister begin het, het daartoe gelei dat 60-persent van vlugte afgestel moes word. Die vlieëniers eis ‘n salarisverhoging van 15,7-persent terwyl SAL 8,46-persent aanbied. Uitvoerende hoof John Lamola waarsku oor finansiële gevolge as die staking langer as drie dae sou voortduur. Binnelandse lugrederye word oorval deur reisigers wat alternatiewe vlugte soek.

# Die ANC verwelkom die deportasie van Janusz Waluś na Pole nadat hy sy parool voltooi het. Die sekretaris-generaal van die ANC, Fikile Mbalula, kritiseer Waluś omdat hy Suid-Afrika verlaat het sonder om die volle waarheid oor die sluipmoord op die anti-apartheidsaktvis, Chris Hani, in 1993 te openbaar. Hani se familie dring aan op ‘n verdere ondersoek. Mbalula sê dis ‘n moeilike tyd vir Suid-Afrikaners en die Hani-gesin:

# Die Tygervallei-winkelsentrum in Bellville, Kaapstad, is vroeër vandag ontruim ná ‘n bomdreigement. Volgens ooggetuies het honderde mense in die parkeerterreine saamgedrom en gewag vir meer inligting. Iemand het in ‘n Facebook-plasing gesê hy was in die sentrum se kos-vierkant toe die ontruimingsbevel gegee is. Die sentrum se bestuur het ‘n ruk gelede bevestig die polisie se bom-afdeling het die sentrum veilig verklaar. ‘n Polisiewoordvoerder, Wesley Twigg sê die sentrum is weer oopgestel en sake verloop soos gewoonlik:

# Die DA se federale leier, John Steenhuisen, gee premier Panyaza Lesufi die skuld vir die verergerende waterkrisis in Gauteng en sê hy stel nie doeltreffende oplossings in nie. Steenhuisen het die DA verbind tot beter waterinfrastruktuur en beklemtoon die behoefte aan samewerking oor alle regeringsvlakke. Hy vra ‘n praktiese oplossing vir die nasionale waterkrisis:

# Rugby: 2024/25 se Kampioenebeker-reeks begin die naweek, en die eerste wedstryd is vanaand in Engeland tussen Bath en La Rochelle. Drie Suid-Afrikaanse spanne speel in die kompetisie, wat beskou word as die toppunt van klubrugby in die wêreld. Dit behels 24 spanne wat in vier groepe meeding. Die Haaie speel môremiddag in Durban teen Exeter Chiefs, en die Stormers in Gqebeha teen Toulon. Die Bulle pak Saracens môreaand in Londen.

# En die finansiële aanwysers: Die rand verhandel teen 17-rand-98-sent teen die dollar, 19-rand-3-sent teen die euro en 22-rand-96-sent teen die pond. Bitcoin verhandel teen 98-duisend-836-dollar. Die prys van goud is twee-duisend-628-dollar-32-sent per fynons en die prys van Brent-ruolie 71-dollar-25-sent per vat.

Bly ingeskakel vir meer nuus……………….