Nuus 18:00

BULLETIN NUUSAGENTSKAP 5 Desember 6 nm

Goeiemiddag. Ek is……..

In die bulletin:

# Die kabinet bepleit openbare-polisie-vennootskappe om misdaadbekamping te versterk 
# NSFAS dien sy 2022/23-verslag by die Parlement in
# En, rugby: Die Blitsbok-afrigter het ‘n ander strategie vir die naweek se toernooi in Kaapstad

# Die kabinet het ‘n beroep gedoen vir beter samewerking tussen die publiek en die polisie om die bekamping van misdaad te versterk. Hulle is van mening samewerking sal lei tot veiliger omgewings en beter misdaadbekampingstrategieë. Die minister in die Presidensie, Khumbudzo Ntshavheni, het op ‘n nuuskonferensie gesê misdaadvoorkoming vereis gesamentlike optrede deur alle sektore van die samelewing om toenemende misdaad aan te pak en ‘n veiliger omgewing vir landsburgers te skep:

# Die Nasionale Finansiële Hulpskema vir Studente het uiteindelik sy jaarverslag vir 2022/23 aan die Parlement voorgelê, ‘n betekenisvolle stap vorentoe ten spyte van onbestendige leierskap. Die portefeuljekomitee vir Hoër Onderwys is besorg oor NSFAS se aanspreeklikheid, veral ten opsigte van verkwistende uitgawes. Die voorsitter van die komitee, Tebogo Letsie, wys op NSFAS se sleutelrol vir studente, en dring aan op aanspreeklikheid vir toekomstige befondsing. Woordvoerder Jabulani Majozi sê belanghebbendes verseker hulle is gereed vir die nuwe akademiese jaar:

# Etana Energy het ‘n ongekende waarborgsooreenkoms onderteken ter waarde van 1,8-miljard-rand met GuarantCo en British International Investment om nege-miljard-rand in hernubare energieprojekte te ontsluit. Die ooreenkoms ondersteun die energie-oorgang in Suid-Afrika wat 500 megawatt wind- en sonkrag moontlik maak. Pogins sal ook aangewend word om koolstofdioksieduitstralings ​​jaarliks met 1,2-miljoen ton te verminder. Die onderneming sê dit bied inkomstesekerheid vir onafhanklike kragvervaardigers, wat die Billike Energie-oordrag venootskapsdoelwitte bevorder.

# Rugby: Die afrigter van die Springbok Sewes, Philip Snyman, het ‘n nuwe benadering vir die naweek se toernooi in Kaapstad, wat hulle bitter graag wil wen. Die spelers gaan probeer om die bykomende druk te verwerk om voor hulle tuisskare te speel. Hulle mag tydens die toernooi nie by hulle gesinne wees nie omdat Snyman glo hulle moet net op rugby ingestel wees. Hy besef daar gaan bykomende druk op die Blitsbokke wees weens die nuwe formaat waar net die vier groepwenners regstreeks na die halfeindronde deurdring.

# Die finansiële aanwysers: Die rand verhandel teen 18-rand-2-sent teen die dollar, 19-rand-4-sent teen die euro en 22-rand-98-sent teen die pond. Bitcoin verhandel teen 102-duisend-857-dollar. Die prys van goud is twee-duisend-646-dollar-98-sent per fynons en die prys van Brent-ruolie 72-dollar-43-sent per vat.

# En ten slotte: ʼn Amerikaanse studie het bevind blootstelling aan algemene lugbesoedelaars soos organiese koolstof en fynstof kan onvrugbaarheid verhoog. Een-duisend-400 individue wat met in vitro-bevrugting besig is, is betrek by die navorsing oor die uitwerking van besoedeling op mans en vroue. Daar is bevind besoedelingstowwe, veral van voertuie en veldbrande, beïnvloed vrugbaarheidsyfers negatief. Die navorsers sê blootstelling moet verminder en lugfiltreerstelsels gebruik word, veral tydens belangrike stadiums van bevrugting.

Bly ingeskakel vir meer nuus……………….