Nuus 18:00

BULLETIN NUUSAGENTSKAP 2 Desember 6 nm

Goeiemiddag. Ek is……..

In die bulletin:
# Die DA versoek minister Creecy om beweerde bedrog by die Lugverkeer-navigasiedienste te ondersoek
# Die Weerdiens waarsku oor ‘n hittegolf en ‘n buitengewone brandgevaar in verskeie provinsies
# En motorsport: Jack Doohan vervang Esteban Ocon in die Alpine-span vir die laaste Grand Prix van die seisoen

# Die DA het die minister van Vervoer, Barbara Creecy, gevra om ondersoek in te stel na beweerde bedrog waarby voormalige raadslede van die Lugverkeer-navigasiedienste betrokke is. Die party sê die dienste het volgens berigte in 2021 bedrieglike betalings ter waarde van meer as 355-duisend-rand aan twee raadslede oorbetaal en die raad kon dit nie terugvorder nie. Die DA-lid, Chris Hunsinger, het Creecy aangemoedig om finansiële dissipline af te dwing om voor die feestyd die vertroue in navigasiedienste te herstel:

# Die Stad Tshwane het ‘n mylpaal-ooreenkoms met Eskom bereik om sy skuld van 6,67-miljard-rand te vereffen. Die burgemeester, Nasiphi Moya, het ‘n vyf-jaar-terugbetalingsplan aangekondig, wat hierdie maand met 400-miljoen-rand begin. Die stad het hom ook daartoe verbind om sy huidige rekenings betyds te betaal om verdere skuld te voorkom. Moya het op ‘n nuuskonferensie die minister van Elektrisiteit en Energie, Kgosientsho Ramokgopa, bedank vir sy hulp met die onderhandelings:

# Die Suid-Afrikaanse Weerdiens sê hittegolwe word hierdie week in verskeie provinsies verwag. Die Noord-Kaap en die Vrystaat sal tot Woensdag uiterste hitte ervaar, met KwaZulu-Natal, Gauteng, Limpopo en Mpumalanga wat tot Vrydag geraak sal word. Die publiek word aangeraai om blootstelling aan die hitte te beperk en genoeg vloeistof te drink. Die diens waarsku ook oor uiters hoë brandgevaartoestande deur die week.

# Motorsport: Jack Doohan van Australië jaag vir Alpine in die plek van Esteban Ocon van Frankryk in eerskomende naweek se laaste Grand Prix van die seisoen in Abu Dhabi. Doohan is vanaf volgende jaar ‘n bestuurder by die span, naas Pierre Gasly van Frankryk, terwyl Ocon oorskuif na Haas. Die span het besluit om Doohan die geleentheid te gee om ŉ Grand Prix-naweek te beleef voor volgende seisoen begin. Ocon sal intussen sy nuwe Haas-motor volgende week op die proef stel tydens ŉ na-seisoense oefening in Abu Dhabi.

# Die finansiële aanwysers: Die rand verhandel teen 18-rand-16-sent teen die dollar, 19-rand-8-sent teen die euro en 23-rand-3-sent teen die pond. Bitcoin verhandel teen 95-duisend-605-dollar. Die prys van goud is twee-duisend-648-dollar-27-sent per fynons en die prys van Brent-ruolie 72-dollar-54-sent per vat.

# En ten slotte: Die voormalige Openbare Beskermer, Thuli Madonsela, glo betekenisvolle gesprekke kan Suid-Afrika se verhaal verander. Sy het op die Chota Motala-gedenklesing van MANCOSA benadruk ongelykhede moet aandag kry, eenheid moet nagejaag en maatskaplike geregtigheid bevorder word. Madonsela wys op die behoefte aan etiese leierskap om ongelykheid te pak, asook rassepolarisasie en tekortkominge aan demokratiese vertroue. Sy het Suid-Afrikaners versoek om grondwetlike waardes opnuut aan te gryp en verdeeldheid te oorbrug.

Bly ingeskakel vir meer nuus……………….