Nuus 18:00

BULLETIN NUUSAGENTSKAP 26 November 6 nm

Goeiemiddag. Ek is……..

In die bulletin:

# Die Inkomstediens slaan toe op ‘n Durbanse sakevrou se huis oor belastingskuld van 37-miljoen-rand
# ‘n Besluit oor FlySafair se internasionale vlugte word uitgestel tot Januarie
# En, rugby: Die terugkerende Bokke versterk die Bulle se span vir hulle Europese toer

# Die Hooggeregshof in Durban het ‘n bevel aan die Suid-Afrikaanse Inkomstediens toegestaan vir deursoeking en beslaglegging teen die sakevrou, Shauwn Mkhize. Hierdie skuif voorkom die vervreemding van bates en verseker nakoming van belastingwette. Mkhize skuld na bewering 37-miljoen-rand in onbetaalde belasting. Die Inkomstediens se kommissaris, Edward Kieswetter, het wetstoepassers geprys vir hulle samewerking. Mkhize was ook in 2020 betrokke in ‘n belasting-geskil ter waarde van 204-miljoen-rand. Dit het gelei tot die beslaglegging op bates en die likwidasie van haar onderneming, Zikhuluse Cleaning, Maintenance and Transport.

# ‘n Besluit oor moontlike optrede teen FlySafair se internasionale vlugte is uitgestel tot volgende jaar. News24 berig die lugredery daag die besluit deur die Internasionale Lugdiensteraad uit dat hy plaaslike lisensiëringswette oortree het deur die buitelandse maatskappy ASL Aviation Holdings toe te laat om ‘n aandeel van 74,86-persent in sy moedermaatskappy te bekom. Die hofsaak vind volgende maand plaas en ‘n finale besluit word volgende jaar verwag. FlySafair het bevestig sy internasionale vlugte gaan soos gewoonlik voort sonder enige onderbrekings. 

# Die Gautengse LUR vir Finansies, Lebogang Maile, waarsku e-tolskuld van 20,1-miljard-rand sal provinsiale hulpbronne strem. Hy het tydens die aanbieding van die minibegroting die versekering gegee geen poste in sleutelsektore soos onderwys en gesondheid sal gesny word nie. Maile het oorweging geskenk aan pogings om fiskale beperkings met noodsaaklike dienste te balanseer:

# Die Wes-Kaapse premier, Alan Winde, het sy voortgesette kommer uitgespreek oor die bendegeweld en dwelmverwante misdaad in die provinsie. Die jongste misdaadstatistieke toon wel ‘n afname van 8,7-persent in moorde, maar Winde voer aan misdaad bly ‘n aansienlike probleem. Hy vra die nasionale regering om die wetstoepassings-begroting te verhoog en doen ook ‘n beroep vir verbeterde ondersteuning van ondersoeke en die strafregstelsel om te verseker misdadigers dra die gevolge van hul dade:

# Rugby: Die Bulle se direkteur van rugby, Jake White, het sy groep met terugkerende Springbokke versterk vir hulle toer na Europa. Hulle sluit in Gerhard Steenekamp, Johan Grobbelaar, Wilco Louw, Cameron Hanekom, Elrigh Louw, Marco van Staden, Willie le Roux en Canan Moodie. Die Pretoriase span speel Saterdag in Galway teen Connacht in die Verenigde Rugbykampioenskap en ‘n week later in Londen teen Saracens in hulle eerste wedstryd in die Kampioenebekerkompetisie. Die Bulle is tans derde op die VRK-punteleer.

# En die finansiële aanwysers: Die rand verhandel teen 18-rand-15-sent teen die dollar, 19-rand-4-sent teen die euro en 22-rand-82-sent teen die pond. Bitcoin verhandel teen 91-duisend-981-dollar. Die prys van goud is twee-duisend-631-dollar-92-sent per fynons en die prys van Brent-ruolie 72-dollar-85-sent per vat.

Bly ingeskakel vir meer nuus……………….