Nuus 18:00

BULLETIN NUUSAGENTSKAP 22 November 6 nm

Goeiemiddag. Ek is……..

In die bulletin:

# Die Suid-Afrikaanse maatskappy Harith General Partners bekom ‘n infrastruktuurfonds vir 6,5 miljard-rand
# Thuli Madonsela word lid van die globale sportarbitrasieraad
# En, markneigings toon ‘n afname in verbruikersgeesdrif oor Swart Vrydag

# ‘n Groep beleggers, onder leiding van die Suid-Afrikaanse privaat beleggingsmaatskappy, Harith General Partners, het ingestem om ‘n infrastruktuurfonds vir 6,5-miljard-rand te bekom. Volgens Bloomberg het die fonds belange in die Lanseria Internasionale Lughawe en Kelvin-kragstasie en bied ‘n geleentheid vir beleggers soos Suid-Afrika se Pensioenfonds vir Staatsamptenare. Harith sal met Mergence Investment Managers en Zungu Investments saamwerk. Uitvoerende hoof, Sipho Makhubela, beklemtoon die belangrikheid van die transaksie te midde van trae privaat beleggingsbedrywighede en die groeiende infrastruktuurbehoeftes in Afrika.

# Die portefeuljekomitee oor Gemeenskapsveiligheid in die Noordwes-wetgewer het vandag die vordering met reddingspogings van onwettige mynwerkers in Stilfontein dopgehou. Hulle het ‘n toesigbesoek gedoen om te verseker alle belanghebbendes, insluitend die polisie en reddingspanne, vervul hul rolle. Meer as een-duisend-400 mynwerkers het tot dusver uit die myntonnels gekom. Die komitee se woordvoerder, Freddy Sonakile, sê gesprekke is aan die gang om soortgelyke voorvalle te voorkom:

# Die vakbondfederasie Saftu doen ‘n beroep vir sterker valutabeheer om die plaaslike ekonomie teen finansiële uitvloei te beskerm, met ‘n geskatte 1,1-duisend-miljard-rand wat jaarliks landuit gaan. Saftu veroordeel die besluit van die Suid-Afrikaanse Reserwebank om rentekoerse met slegs 25 basispunte te verlaag. Mogoshadi Maserumule van Saftu sê hierdie besnoeiing sal mense wat met skuld sukkel nie help nie, aangesien dit leningterugbetalings minimaal verminder:

# Nou sportnuus: Die voormalige openbare beskermer, Thuli Madonsela, is aangestel op die Internasionale Raad vir Arbitrasie vir Sport in Lausanne, Switserland. Die Internasionale Olimpiese Komitee het haar aangewys om die vakature te vul na die dood van regter Yvonne Mokgoro vir die termyn van 2023 tot ’26. Die raad is in 1994 gestig en bestuur die Hof van Arbitrasie vir Sport, wat geskille in sport wêreldwyd deur middel van bemiddeling en arbitrasie besleg. Die instelling, wat deur Olimpiese en nie-Olimpiese federasies erken word, hanteer jaarliks ​​ongeveer 900 sake.

# Die finansiële aanwysers: Die rand verhandel teen 18-rand-9-sent teen die dollar, 18-rand-86-sent teen die euro en 22-rand-66-sent teen die pond. Bitcoin verhandel teen 97-duisend-985-dollar. Die prys van goud is twee-duisend-690-dollar-91-sent per fynons en die prys van Brent-ruolie 73-dollar-68-sent per vat.

# En ten slotte: Markneigings toon ‘n afname in verbruikers se geesdrif oor Swart Vrydag, met ‘n noemenswaardige daling in besteding en transaksies. Kleinhandelaars pas hierby aan deur hul promosies oor die hele November te versprei en skep dus ‘n Swart November eerder as om te fokus op slegs ‘n enkele dag. Data van Absa Korporatiewe en Beleggingsbankdienste wys verbruikersgedrag verander weens ekonomiese druk soos inflasie en hoë rentekoerse en mense fokus op noodsaaklike goedere. Aanlyn inkopies het toegeneem, maar voete in winkels het aansienlik gedaal.

Bly ingeskakel vir meer nuus……………….