Nuus 18:00

BULLETIN NUUSAGENTSKAP 21 November 6 nm

Goeiemiddag. Ek is……..

In die bulletin:

# Suid-Afrika verwelkom die Internasionale Strafhof se lasbriewe vir Netanyahu, Gallant en Deif
# Die terugkoopkoers word verlaag met 25 basispunte
# En, rugby: Philip Snyman kondig ‘n ervare Blitsbok-groep aan vir die Dubaise Sewes

# Die Suid-Afrikaanse regering het die Internasionale Strafhof se lasbriewe verwelkom vir die inhegtenisneming van die Israelse premier, Benjamin Netanyahu, die land se voormalige minister van Verdediging, Yoav Gallant, en die Hamas-leier, Mohammed Deif. Die woordvoerder vir Internasionale Betrekkinge, Chrispin Phiri, noem dit ‘n beduidende ontwikkeling en herhaal Suid-Afrika se verbintenis tot die internasionale reg. Hy sê die regering vra globale aanspreeklikheid om menseregte en geregtigheid in die konflik tussen Palestina en Israel te handhaaf:

# Die Reserwebank se Monetêre Beleidskomitee het besluit om die terugkoopkoers met 25 basispunte te verlaag tot 7,75-persent. Dit volg op gister se die aankondiging dat inflasie in Oktober tot 2,8-persent gedaal het – laer as die bank se inflasieteiken van tussen 3- en 6-persent. Die koersverlaging beteken dat die prima uitleenkoers daal tot 11,25-persent.

# Rise Mzansi waarsku teen die misbruik van openbare fondse ná die afkondiging van ‘n ramptoestand weens voedseloordraagbare siektes. Hierdie siektes het reeds 22 lewens geëis en altesaam 890 gevalle is aangemeld. Rise Mzansi se woordvoerder, Mabine Seabe, het die minister van Samewerkende Regering en Tradisionele Sake, Velenkosini Hlabisa, aangemoedig om maatreëls in te stel wat politici en amptenare verhoed om openbare fondse te plunder tydens die ramptoestand:

# Die Wes-Kaapse brandseisoen het begin met brande wat onlangs in die Nuweland-bos en by Hermanus aangemeld is. In die Wes-Kaap kom die brandseisoen in die somer voor en duur van Desember tot April. Die uitvoerende hoof van die Vrywillige Veldbranddienste, Claire Lotter, sê die spanne verwag ‘n besige seisoen, maar is voorbereid daarop. Kenners sê die meeste brande, veral veldbrande, word doelbewus of per ongeluk deur die mens veroorsaak.

# Rugby: Die hoofafrigter van die Springbok Sewes, Philip Snyman, het tien vorige wenners van die Dubaise Sewes in sy groep ingesluit vir die eerste sewestoernooi van die seisoen in die Verenigde Arabiese Emirate. Die nuwelinge Donovan Don, David Brits, en Tristan Leyds sluit aan by die gesoute spelers Impi Visser en Zain Davids, wat die medekapteins is. Volgens Snyman wil hulle die diepte in die groep uitbou en mik na die top vier in elke toernooi:

# Die finansiële aanwysers: Die rand verhandel teen 18-rand-1-sent teen die dollar, 18-rand-96-sent teen die euro en 22-rand-76-sent teen die pond. Bitcoin verhandel teen 97-duisend-546-dollar. Die prys van goud is twee-duisend-670-dollar-12-sent per fynons en die prys van Brent-ruolie 73-dollar-79-sent per vat.

# En ten slotte: Die Nasionale Seereddingsinstituut het ŉ nuwe model verwelkom om die gevaar van trekstrome te voorspel. Die model is deur die Suid-Afrikaanse Weerdiens ontwikkel en in Kaapstad bekendgestel. Die doel is om strande veilig te maak deur akkuraat te voorspel wanneer trekstrome gaan vorm. ŉ Woordvoerder van die NSRI, Andrew Ingram, het aan die SABC gesê die instrument sal die feestyd se beplanning verbeter. Die model sal na die Oos-Kaap en KwaZulu-Natal uitgebrei word.

Bly ingeskakel vir meer nuus……………….